Башҡортостан Башлығы Путинға Ишембай ҡалаһына маҡтаулы исем биргәне өсөн рәхмәт белдерҙе

Башҡортостан Башлығы Радий Хәбиров Рәсәй Президентына Ишембайға «Хеҙмәт ҡаһарманлығы ҡалаһы» тигән маҡтаулы исем бирергә тигән ҡарары өсөн рәхмәт белдерҙе. Владимир Путин тейешле указға ҡул ҡуйған.

Республика етәксеһенең социаль селтәрҙәге сәхифәһендә яҙмаһы Ишембай ҡалаһына бағышланған.

«Был исемдең Бөйөк Еңеүҙең 80 йыллығы билдәләнгән йылда бирелеүе символик мәғәнәгә эйә. Бөйөк Ватан һуғышы йылдарында тап Ишембай — «икенсе Баҡы» — фронт ихтыяжын тәьмин итә. Бында 4,5 миллион тонна нефть сығарылған — һуғыш йылдарында СССР-ҙа алынғандың дүрттән бер өлөшө.

Ишембай Башҡортостанда Өфөнән һуң «Хеҙмәт ҡалаһы ҡалаһы» исеменә лайыҡ булған икенсе ҡала. Республика халҡы фронтта һәм тылда күрһәткән батырлығы, көндәлек фиҙаҡәр хеҙмәте менән Еңеүҙе яҡынайтты.

Һуңғы йылдарҙа Ишембай бик әүҙем үҫешә. Ҡалала матур парктар, скверҙар барлыҡҡа килде, Башҡортостан нефтен беренсе булып асыусылар майҙаны төҙөкләндерелде. Иҡтисад һәйбәт эшләй, шул иҫәптән «Алға» махсус иҡтисади зонаһы һәм, әлбиттә, Ишембайҙың уңған халҡы ярҙамында.

Бындай үҙгәртеп ҡороуҙа Ишембайҙың социаль өлкәһенә күп көс һалған «Башнефть» компанияһының да өлөшө ҙур. Быйыл ҡалаға 85 йыл тула. Алда – ишембайҙар өсөн яңы ҡарарҙар һәм ҡыҙыҡлы проекттар».

Радий Хәбиров һүҙҙәренсә, «Ишембай – хеҙмәт ҡаһарманлығы ҡалаһы» стелаһын иң яҡшы урынға ҡуйырға йыйыналар. Уны ҡала халҡы менән бергә һайлайҙар.

«Башинформ» Ишембайҙың Рәсәйҙең ошо исемгә лайыҡ булған ете ҡалаһы иҫәбенә инеүе тураһында хәбәр иткәйне. Ҡурған (Ҡурған өлкәһе), Үрге Пышма (Свердловск өлкәһе), Ишембай (Башҡортостан Республикаһы), Ковров (Владимир өлкәһе), Мейәс (Силәбе өлкәһе), Зеленодольск (Татарстан Республикаһы), Ленинск-Кузнецкий (Кемеров өлкәһе) һәм Салехард (Ямал-Ненец автономиялы округы).

https://www.bashinform.ru/news/politics/2025-01-15/radiy-habirov-poblagodaril-putina-za-prisvoenie-pochetnogo-zvaniya-ishimbayu-4085040