Рөстәм Хәмитовтың Указы менән Башҡортостан Республикаһы Президенты ҡарамағындағы кадрҙар комиссияһы ойошторолдо. Был коллегиаль кәңәш биреү органы дәүләт, дәүләт граждан хеҙмәте, республика ҡарамағындағы ойошмалар етәкселәре вазифаһына тәғәйенләү өсөн кандидаттар һайлау менән шөғөлләнәсәк.

Дәүләт, урындағы үҙидара органдарына кадрҙар мәсьәләләре буйынса тәҡдимдәр әҙерләү, республикалағы кадрҙар сәйәсәтенең башҡа мөһим мәсьәләләрен ҡарау комиссияның бурысы булып тора.
Был эшкә ғалимдарҙы, йәмәғәтселек вәкилдәрен, бойондороҡһоҙ эксперттарҙы йәлеп итеү күҙаллана.
Рөстәм Хәмитов шулай уҡ үҙенең икенсе Указы менән Өҫтөнлөклө инвестиция проекттарын ҡарау һәм уларға булышлыҡ итеү буйынса Хөкүмәт комиссияһы составын раҫланы, уға 18 кеше инде.
Хөкүмәт комиссияһы өҫтөнлөклө инвестиция проекттарына дәүләт ярҙамы күрһәтеү буйынса тәҡдимдәр индерә, шулай уҡ ер участкаларын һайлау һәм рәсмиләштереү, инженерлыҡ-транспорт инфраструктураһын үҫтереү, рөхсәт биреү документтарын әҙерләү һәм раҫлауға бәйле мәсьәләләрҙе йылдам хәл итеүҙә инвесторҙарға булышлыҡ итә, күҙәтеү органдары менән үҙ-ара мөнәсәбәттәрҙе көйләй.
Башҡортостанда инвестиция проектын тормошҡа ашырырға теләгән инвестор үҙен республикалағы өҫтөнлөклө проекттар исемлегенә индереү тураһында ғариза ебәрә. Башҡортостандың Иҡтисади үҫеш министрлығы ыңғай һығымта сығарған осраҡта проект дәүләт ярҙамына дәғүә итә ала. Капитал һалыу рәүешендәге инвестициялар күләме кәмендә 100 миллион һум тәшкил итергә тейеш. Медицина техникаһы һәм фармацевтика продукцияһы, юғары һәм мәғлүмәт технологиялары етештереү өлкәһендәге проекттарға бындай талап ҡуйылмай.
Хөкүмәт комиссияһы ултырыштары кварталға кәмендә бер тапҡыр үткәрелә.


Уй-фекерҙәр:

Александр МАРЬИН, иҡтисади үҫеш министрының беренсе урынбаҫары:
— Бер кемгә лә сер түгел: әле Рәсәйҙең күп төбәктәре инвестициялар өсөн көрәшә. Унда инвесторҙар өсөн уңайлы шарттар тыуҙырыусылар ғына түгел, һөҙөмтә биргән проекттарға иғтибар итеүселәр ҙә еңә. Инвестор социаль-иҡтисади хәле тотороҡло, партнерҙары ышаныслы булған төбәккә генә барасаҡ. Уға командала тиҙ һәм һөҙөмтәле эшләү файҙалы.

Илдар ҒӘБИТОВ, иҡтисадсы:
— Бындай комиссияның булыуы, хәҙер уға Президенттың шәхсән етәкселек итә башлауы республикала был мәсьәләгә ҙур иғтибар бирелеүе хаҡында һөйләй. Шарттарҙы һәм өҫтөнлөктәрҙе аныҡ билдәләү мөһим. Яңыса эшләү коррупцияға юл ҡуймаясаҡ. Һәр саҡ аҡсалы проекттар менән генә ҡыҙыҡһыныу дөрөҫ түгел. Әлеге комиссия социаль өлкә өсөн уңайлыраҡ шарттар булдырасаҡ, минеңсә, сөнки Хөкүмәт иң тәүҙә халыҡтың йәшәү сифатын яҡшыртыу өсөн тырыша.

Рөстәм ХӘСӘНОВ, йәш белгес:
— Хөкүмәт комиссияһы яйға һалынған технология буйынса эшләй, инвестор өсөн шарттар билдәләй. Мәҫәлән, һалым кәметелә, сығымдар субсидиялана. Бөгөн өҫтөнлөклө тип иҫәпләнгән 50-нән ашыу инвестиция проекты бар. Бынан тыш, республика Хөкүмәте ҡарарына ярашлы өҫтөнлөклө инвестиция проекттарын тормошҡа ашырыу барышына мониторинг үткәреү буйынса рәсми документ булдырылды. Ул бүленгән дәүләт ярҙамын файҙаланыуҙың һөҙөмтәлелеген арттырыуға йүнәлтелгән.