“Башҡортостандың мөмкинлектәре алға ынтылыш яһауға юл аса”, – тине Рәсәйҙең билдәле эшҡыуары, Федерация Советы ағзаһы Рәлиф Сафин. Ул “Башинформ” агентлығына интервью бирҙе.
“Бәләкәй Ватаным – ата-бабам тыуған, үҙем донъяға килгән һәм үҫкән, ялан аяҡ йүгергән, балыҡҡа барған, мәктәпкә йөрөгән, атай-әсәйем, туғандарым ерләнгән төйәк. Беҙҙе лә шунда ерләйәсәктәр... Бәләкәй Ватан – берләштереүсе, туплаусы үҙәк ул”, – тигән Рәлиф Рәфил улы.
Эшҡыуар мәктәпкә биш йәшендә барғаны хаҡында иҫкә алған. “Ни өсөн тигәндә, башланғыс белем усағын киләһе йылда ябырға йыйыналар, һөҙөмтәлә миңә беренсе класта сит ауылға йөрөп уҡырға тура килер ине, – тигән. – Атайым көтөүсе булды, мин уға дәрескә тиклем ярҙам итеп китә инем. Балыҡҡа йөрөнөк, сиратлап һарыҡ, һыйыр көттөк, көҙ ауылдаштар бер-беребеҙгә һуғым һуйышырға, ҡаҙ йолҡорға йөрөй инек. Ғөмүмән, бала сағым шундай матур, әммә ауыр булды”.
Рәлиф Сафин заманында атаһы биргән өс тоҡ картуфты һатып БДУ-ның тарих факультетына килгәне, әммә, аҡса етмәгәс, уҡыуҙан китергә мәжбүр булғаны, һөҙөмтәлә эшкә урынлашҡаны, шул саҡта нефть тармағына юл асылғаны хаҡында бәйән итә.
“Минең өсөн беренсе урында – ғаиләм һәм дуҫтарым, – ти эшҡыуар. – Аҡса эшләргә һәм дуҫ йәшәргә мөмкин, әммә был – бик һирәк кешеләргә бирелгән һәләт”.
“Ә Мортаза Ғөбәйҙулла улы менән мөнәсәбәтегеҙ нисек?” тигән һорауға Рәлиф Сафин: “Биш йыл элек беҙ уның менән осраштыҡ, ҡосаҡлашып күрештек, сәй эстек. Мортаза Ғөбәйҙулла улына ихтирам-хөрмәтем ҙур, ул Башҡортостан өсөн бик күпте эшләне”, – тип яуап биргән.
Радий Хәбиров тураһында иһә: “Башҡортостанда тыуған, ошонда юғары белем алған, юғары урындарҙа хеҙмәт иткән, төбәктәге проблемаларҙы белгән кеше республика өсөн барыһын да эшләйәсәк, – тип белдергән. – Һәм бөтөн кеше уға ярҙам итәсәк. Мин Радий Фәрит улының Дәүләт Йыйылышына Мөрәжәғәтнамәһен – үҙенең көсөнә, хаҡлығына ышанған, фекерҙәрен аныҡ еткергән етәксенең һүҙҙәрен – аяғөҫтө баҫып тыңланым”.
Рәлиф Сафин республиканы инвестицияларға планлаштырыуын белдергән. “Яҡын арала төбәк етәкселеге менән аныҡ йүнәлештәрҙе билдәләйәсәкбеҙ, – тигән. – Сәйәсәт түгел, ә бизнес менән шөғөлләнергә теләйем”. Эшҡыуар Башҡортостанда халыҡ яратҡан, аныҡ хәлде аңлаған, дөрөҫ маҡсат һәм бурыстар ҡуя белгән, биргән вәғәҙәһен үтәгән власть булыуын теләгән, республиканың яҡты киләсәгенә ышаныс белдергән.