Өфөлә кесе һәм урта эшҡыуарлыҡ буйынса “Рәсәй терәге” дөйөм Рәсәй ижтимағи ойошмаһы лидерҙарының XIII съезы үтте.

Эшлекле осрашыуҙа республика Башлығы вазифаһын ваҡытлыса башҡарыусы Радий Хәбиров та ҡатнашты.

Республикала бизнесты үҫтереүҙә тейешле шарттар булдырылған. Мәҫәлән, күп күрһәткестәр, шул иҫәптән кесе эш­ҡыуарлыҡ иҫәбе йәһәтенән Башҡортостан Рәсәй төбәктәре араһында лайыҡлы урын биләй. “Рәсәй терәге”нең һуңғы йылдарҙағы эшмәкәрлегенә күҙ һалғанда, ижтимағи ойошмалар менән берлектә бизнесты үҫтереүгә ярҙамын, ҙур ҡаҙаныштарға өлгәшеүен күрергә мөмкин. Был беренсе сиратта үҙ эшеңде асҡанда административ кәртәләрҙе кәметеү йәһәтенән әүҙем, һөҙөмтәле эш менән аңлатыла.

Бөгөн Башҡортостанда кесе һәм урта эшҡыуарлыҡта 147 мең кеше мәшғүл. “Рәсәй терәге” президенты Александр Калинин был һандың төбәк өсөн ярайһы күп булыуын билдәләне, шулай уҡ уларҙың проблемаларын телгә алды. Йәшерен-батырын түгел: үҙ эшен асыусылар төрлө ҡыҫырыҡлауға дусар. Был һалым түләү, административ кәртәләр, тышҡы баҙарға сыға алмау, дәүләт һатып алыуҙарында сикләнгәнлек.
Әлбиттә, дәүләт ярҙамы бар, улар милли проекттарҙа һалынған һәм шаҡтай күләмдә финанс менән нығытылған.

Алдағы алты йылда 600 миллиард һум аҡса бүленәсәк. Ул биш федераль проектта тупланған. Һәр йылға аныҡ һалынған, һө­ҙөм­тә күрһәткестәренә яуаплы кешеләр бер­кетелгән. Шуның яртыһынан күберәген төбәктәр аласаҡ, – тине Александр Калинин.

Йыйында илдең тулайым эске продуктына кесе эшҡыуарлыҡтың өлөшөн артты­рыу мөмкинлеге хаҡында ла фекер алышыу булды. Һуңғы дүрт йылда ул 18-ҙән 22 про­центҡа еткән. Хәҙер эшҡыуарҙар бер­ҙәм­легенә был күрһәткесте ике тапҡырға күбәйтеү һәм уны 40 процентҡа тиклем ет­кереү бурысы ҡуйыла. Әлбиттә, бының өсөн халыҡ ихтыяжын арттырыу мөһим. Әммә был юҫыҡта шаҡтай проблемалар бар.

– Беҙ шәхси эшҡыуарлыҡтың күп аҡсаһын алып еткермәйбеҙ. Бөгөн 25 триллион һум аҡса банк депозиттарында ята. Был йүнәлештә Дәүләт Думаһы һәм төбәктәр депутаттарына эшләргә кәрәк, – тине “Ресәй терәге” етәксеһе.

Ҡытай менән иҡтисади бәйләнештәрҙе лә нығытыу үҫеш өсөн бер баҫҡыс булыр ине. Шул уҡ ваҡытта күрше илгә Рәсәй төбәктәренән тура рейстар юҡ. Һөҙөмтәлә бизнес-проекттар Мәскәүҙә һәм Санкт-Петербургта ятып бурһый.

Сығыш яһаусы Рәсәй эксперт үҙәгенә лә дәғүәһен белдерҙе. Мәҫәлән, эшҡыуар­ҙар яңы технологиялар алыр өсөн күргәҙмә­ләргә барыу ғына түгел, ә экспортҡа оҙата алырҙай продукцияһын да күрһәтеү мөмкинлегенә эйә булырға тейеш.

Съезда шулай уҡ кесе эшҡыуарлыҡҡа кредит биреү мәсьәләһе хаҡында ла һөйләшеү булды. Киләһе йыл 8,5 процент менән триллион кредит алыу маҡсаты ҡуйылды. Бөгөн бизнес өсөн ставка уртаса 12 процент тәшкил итә.

“Эшлекле Рәсәй”ҙән Андрей Назаров әйтеүенсә, кесе эшҡыуарлыҡтың шаҡтай проблемалары муниципаль кимәл менән бәйле. Тап шуға ла ул Башҡортостанда эшҡыуарлыҡҡа ярҙам һәм уны үҫтереүҙең муниципаль стандартын индереүҙе тәҡдим итте. Документта чиновниктар өсөн талаптар күрһәтеләсәк, уға ярашлы улар бизнесҡа ярҙам һәм үҫтереү өсөн шарттар тыуҙырырға тейеш. Мәҫәлән, эшкә тотоноу өсөн документтар юллау юлдары ҡыҫҡартыла, даими өйрәтеү семинарҙары ойоштороласаҡ, муниципаль кимәлдә күҙәтеү эше өҫтәлә.

Эксперттар һәр муниципалитеттар һәр чиновникка яңы ҡағиҙәләрҙе үтәү яуаплылығын беркетеүҙе, ә уның эшен кесе эшҡыуарлыҡтың үҫеше һәм аныҡ биләмәлә иҡтисадҡа индергән өлөшө менән баһаларға тәҡдим итә. Андрей Назаров фекеренсә, пилот проект Башҡортостанда уңышлы һынау үтһә, артабан уны башҡа төбәктәргә даими индерергә мөмкин.