Рәсәй Федерацияһының Дәүләт Думаһы депутаты Зариф Байғусҡаров “Башинформ” агентлығында үткән матбуғат конференцияһында шулай тине.

Зариф Закир улы, яҙғы сессияла закондар сығарыу эшмәкәрлегенә йомғаҡ яһап, үҙе шәхсән биш закон проекты эшләүҙә, тағы 23-өндә авторҙаш булыуын, 53-өнә төҙәтмәләр индереүҙә ҡатнашыуын билдәләне.

Депутат әйтеүенсә, һәр закон кешенең йәшәү рәүешен яҡшыртырға тейеш. Был йәһәттән үткән осорҙа шаҡтай ыңғай күренештәр бар. Мәҫәлән, бөгөн күп функциялы үҙәктәр халыҡҡа уңайлы хеҙмәт күрһәтә. Әммә бығаса райондарҙа уларҙа дәүләт пошлинаһын түләү өсөн махсус урындар булманы. Ошо сәбәпле ауылдан килеүселәрҙең күп ваҡыты сарыф ителде.

Кәмселекте бөтөрөү маҡсатында, үҙәктәрҙең үҙендә үк түләүҙе башҡарыу өсөн махсус закон ҡабул ителгән. Ә ул нисек тормошҡа ашырыла һуң? Зариф Закир улы МФЦ-лар буйынса тикшереү үткәреп, республикала был эш тейешле кимәлдә башҡарылмауын асыҡлаған. Әлеге ваҡытта саралар күрелә.

Депутат тормошобоҙҙа йыш осраған күңелһеҙ күренештәрҙе закон тарафынан көйләү йәһәтенән комитеттың һөҙөмтәле эшмәкәрлеге хаҡында бәйән итте. Мәҫәлән, белем биреү өлкәһендә ҡыуаныслы һөҙөмтәләргә өлгәшелгән. Мәғлүм булыуынса, XI класты тамамлағандарға Берҙәм дәүләт имтиханы ойошторған өсөн уҡытыусыларға өҫтәмә аҡса түләнһә лә, туғыҙынсынан һуң дөйөм дәүләт имтиханы алыусыларға бындай саралар ҡаралмағайны. Зариф Закир улы комитеттың ошо мәсьәләне күтәреп, уңышлы ҡабул ителеүе хаҡында белдерҙе. Яңы закон 2019 йылдың 1 ғинуарынан үҙ көсөнә инә. Шулай уҡ туған телдәрҙе яҡлау, был юҫыҡтағы законды камиллаштырыу буйынса ла шаҡтай мөһим эштәр башҡарылған.

Депутат бөгөнгө матбуғат саралары хаҡында ла үҙ фекерен еткерҙе. “Райондарҙа күп йөрөгәс, халыҡ менән аралашҡас, белеп, күреп торам: интернет заманы булһа ла, өлкән быуын башлыса гәзит-журнал уҡый. Шуға үҙем мохтаждарға ваҡытлы матбуғат сараларына подписка бүләк итәм. Бүтәндәр ҙә ошондай алым менән, беренсенән, халыҡты ҡыуандырһа, икенсенән, баҫмаларҙың тиражын арттырыуға ҙур өлөш индерер ине”, – тине ул.

Юл ҡағиҙәләре боҙған өсөн штраф быға тиклем дөйөм ҡаҙнаға китһә, киләһе йылдан улай булмаясаҡ. Депутаттарҙың тырышлығы менән хәҙер был аҡса бары урындағы юлдарҙы төҙөкләндереүгә йүнәлтеләсәк.

Конференцияла ҡатнашыусылар Зариф Закир улының социаль селтәрҙәр менән дуҫлығы хаҡында ла ҡыҙыҡһынды.
– Башлыса “Бәйләнештәр” сайтында, “Фейсбук”та ултырам, – тине ул. – Тәүҙә ярҙамсым бар ине, әммә был алым оҡшаманы. Хәҙер тулыһынса үҙем күҙәтәм.