Ошо көндәрҙә республика Хөкүмәте Премьер-министры Рөстәм Мәрҙәнов етәкселегендәге Башҡортостандың рәсми делегацияһының Ҡытай Халыҡ Республикаһына сәфәре тамамланды.

Сычуань провинцияһының халыҡ хөкүмәте губернаторы Инь Ли әфәнде менән осрашыуҙа Башҡортостан Рес­публикаһы менән Сычуань провин­цияһы араһындағы хөкүмәт-ара киле­шеүҙе тормошҡа ашырыуға бәйле мәсьәләләр тикшерелде. Шулай уҡ хеҙмәттәшлектең өр-яңы йүнәлештәре билдәләнде. Студенттар менән мәҙәни алмашыуҙы киңәйтеү күҙаллана. Һөйләшеү йомғаҡ­тарына ярашлы, Чэнду ҡалаһындағы “Ҡытай-Европа” үҙәгендә Башҡортостан вәкиллеген асыу мәсьәләһе ҡарала. Баш­ҡортостанда тормошҡа ашырылған бер­лектәге проекттарға Ҡытай власы яғынан ярҙам күрһәтеү айырым билдәләнде.
Рөстәм Мәрҙәнов әйтеүенсә, Башҡортостан Республикаһы Башлығы Рөстәм Хәмитов һәм республика Хөкү­мәте “Волга — Янцзы” проекты юҫығын­дағы ике яҡлы килешеүҙәрҙе ғәмәлгә ашырыу өсөн ҙур тырышлыҡ һала. Ҡытайҙың иһә “Бер һыҙат — бер юл” башланғысы, республиканың логистика яғынан уңайлы урынлашыуы, уның иҡтисади һәм инвестиция ҡеүәте үҙ-ара файҙалы партнерлыҡты артабан үҫтереү өсөн яҡшы тәүшарттар тыуҙыра.
Бер көн алдан Лэшань ҡалаһының халыҡ хөкүмәте мэры Джан Тун әфәнде менән осрашыу булғайны. Унда социаль-иҡтисади һәм мәҙәни хеҙмәттәшлек мәсьәләләре тикшерелде. Рөстәм Мәрҙәнов Лэшань хөкүмәте вәкилдәрен Башҡортостанға, июнь айында Сибайҙа үтәсәк “Урал аръяғы-2018” иҡтисади форумында ҡатнашырға саҡырҙы. Осра­шыуҙа шулай уҡ Башҡортостан компания­ларының Ҡытайҙағы күргәҙмә-йәрминкә сараларында ҡатнашыу, шулай уҡ республика ҡалаларының береһе менән Лэшань араһында туғанлыҡ бәйләнештәрен булдырыу мөмкинлеге тикшерелде.
Республика Хөкүмәте Премьер-министры урынбаҫары Илшат Тажетдинов республиканың һәм Урал аръяғы райондарының инвестиция ҡеүәте менән таныштырҙы. Сарала 40-тан ашыу ҙур компания ҡатнашты. Сибайҙа ойоштороу күҙалланған индустриаль парктың потенциаль резиденттары менән эшлекле һөйләшеүҙәр үтте. Тау ҡорамалдары, агрохимия препараттары, керамика һәм фарфор етештереү, иген, күн эшкәртеү менән шөғөлләнгән фирмалар мөмкин­лектәр, шарттар менән ҡыҙыҡһынды.
Сәфәр һөҙөмтәһендә Башҡортостан Республикаһы Хөкүмәте, “Сычуань-Сибай” индустриаль паркы” яуаплылығы сикләнгән йәмғиәте һәм “Цзюньхэ”ның тирә-яҡ мөхитен һаҡлау буйынса Сычуань компанияһы” ябыҡ акционерҙар йәмғиәте араһында Сибай ҡалаһында цемент заводын төҙөү буйынса проектты тормошҡа ашырыу хаҡындағы инвестиция килешеүенә ҡул ҡуйылды. Хөкүмәт Премьер-министры урынбаҫары Урал аръяғын иҡтисади үҫтереүҙең урта сроклы комплекслы программаһы кураторы Илшат Тажетдинов һәм компания идараһы рәйесе Ли Лэцзюнь документ аҫтына үҙҙәренең ҡултамғаһын ҡуйҙы.

Рөстәм АФЗАЛОВ, Сибай ҡалаһы хакимиәте башлығы:
— Ошо көндәрҙә Сибайҙа Ҡытай инвесторы ярҙамында цемент заводы төҙөү буйынса килешеүгә ҡул ҡуйылды. Беҙ быға бик шатбыҙ. Төп маҡсат – ҡала халҡына яңы эш урындары булдырыу, йәнә бер ҡеүәтле сәнәғәт предприятиеһы асыу. Әле цемент заводы төҙөргә ниәтләнгән компания теркәлгән, ер байлыҡтарын өйрәнеүгә лицензия алынған, ҡуртымға ер бирелгән. Төҙөлөштө башлау өсөн бөтә документтар әҙер. Шуны ла әйтергә кәрәк, завод янында индустриаль парк сафҡа инәсәк, уның сиктәрендә юнысҡы плитәләр производствоһы төҙөү ҡарала. Әгәр заводта 220 эш урыны булдырылһа, индустриаль парк сафҡа ингәс, 70 кеше эш менән тәьмин ителәсәк.