Рәсәйҙең Дәүләт Думаһы “Дәүләт реестры мәғлүмәттәрендәге ҡаршылыҡтарҙы юҡҡа сығарыу маҡсатында Рәсәй Федерацияһы ҡануниәтенә үҙгәрештәр индереү (“урман амнистияһы”) тураһында”ғы һәм “Граждандарҙың үҙ мохтажлығы өсөн баҡсасылыҡ һәм йәшелсәселек менән шөғөлләнеүе һәм Рәсәй Федерацияһының айырым хоҡуҡи акттарына үҙгәрештәр индереү тураһында”ғы федераль закон проекттарын өсөнсө уҡыуҙа ҡабул итте. Ул беҙгә нимә бирәсәк?
Уларҙың тәүгеһе баҡса ерендә торлаҡ йорт һалыу һәм артабан унда рәсми теркәлеү үтергә мөмкинлек бирә. Был хаҡта элегерәк илдең Конституция суды тарафынан ҡарар ҡабул ителгәйне, йәғни баҡсасыларҙың тормош талаптарының ғәҙеллеге билдәләнгәйне. Рәсәй Президенты Владимир Путиндың күрһәтмәһенә ярашлы, хәҙер был хәл ҡанунлаштырылды. Бынан тыш, баҡсасылыҡ ширҡәте органдары (рәйес һәм идара) эшмәкәрлегенә контроль көсәйтелә, шул иҫәптән – йыйылған иғәнәне нисек һәм ҡайҙа тотоноу буйынса. “Росреестр” етәксеһе Виктория Абрамченко аңлатыуынса, ширҡәттең дөйөм мөлкәте граждандарҙың өлөшләтә милке булып иҫәпләнәсәк. Ҡануниәт баҡса ере менән файҙаланыу мөмкинлектәрен киңәйтеү, ширҡәт етәкселеге һәм башҡа ойошмалар менән мөнәсәбәттә баҡсасыларҙың хоҡуҡтарын яҡлау маҡсатында ҡабул ителгән.
Баҡсасылыҡ ширҡәтенә ағза булып инмәйенсә, баҡса ерен үҙаллы алып барған кешеләр ҙә етерлек. Улар өсөн ширҡәттең дөйөм мөлкәте (юлдар, скважина һ.б.) сығымдарын ҡаплауға аныҡ иғәнә булдырыла, улар был милектең яҙмышын хәл итеү буйынса дөйөм йыйылышта ҡатнашырға ла хаҡлы.
“Урман амнистияһы” проектын да илдең Иҡтисади үҫеш министрлығы Рәсәй Президенты күрһәтмәһенә ярашлы әҙерләгән. Ул дәүләт исемлегендәге (реестрындағы) ҡаршылыҡтарҙы бөтөрөргә йүнәлтелгән: быға саҡлы бер үк биләмәне урман фондына ла, “башҡа ерҙәр” төрөнә лә индерәләр ине. Мәҫәлән, бер исемлектә ер кемдеңдер дачаһы булып иҫәпләнә, икенсеһе буйынса ул урман фондына ҡарай. Һөҙөмтәлә был шәхси милекте бушлай тартып алырға ла мөмкин. Бөгөн Рәсәйҙә ошондай 377 мең баҡса ере бар. Ләкин урман еренең, ҡағиҙә булараҡ, аныҡ ҡына сиге юҡ икәнлеген иҫәпкә алһаҡ, бындай участоктарҙың һаны, Иҡтисади үҫеш министрлығы мәғлүмәттәренә ҡарағанда, бер миллион ярымға етә.
– Был закон проекты күсемһеҙ мөлкәтте намыҫлы һатып алыусыларҙың хоҡуҡтарын яҡлау өсөн әҙерләнде һәм ҡабул ителде, – ти Виктория Абрамченко. – Әлеге ҡаршылыҡтарҙы бөтөрөү граждандарҙың власҡа ышанысын да нығытасаҡ, эшҡыуарҙар өсөн был мәсьәлә буйынса хәүефте лә юҡҡа сығарасаҡ.