Мәғлүм булыуынса, 2011 – 2015 йылдарға төньяҡ-көнсығыш райондарҙы социаль-иҡтисади үҫтереүҙең урта сроклы комплекслы программаһы ҡабул ителгәйне. Республика Хөкүмәте президиумы ултырышында ошо программаны 2020 йылға тиклем оҙайтыу мәсьәләһе ҡаралды.
Хөкүмәт Премьер-министры Рөстәм Мәрҙәнов, уҙған осорға йомғаҡ яһап, документтың төбәк үҫеше өсөн ыңғай йүнәлеш биреүе хаҡында бәйән итте.
– Продукция етештереү күлә­ме 2,3 тапҡырға артты, һалым һәм башҡа түләүҙәр 1,56 тап­ҡырға үҫте, шулай уҡ 5,2 меңдән ашыу кеше эш менән тәьмин ителде, – тине ул сығышында.
Хөкүмәт Премьер-министры урынбаҫары – республика Хөкү­мә­те аппараты етәксеһе Илшат Тажетдинов билдәләүенсә, программа социаль өлкәлә һәм иҡтисадта һиҙелерлек һөҙөмтә­ләргә өлгәшеү мөмкинлеген биргән. Төньяҡ-көнсығыш төбәк райондарында өс мәктәп, алты балалар баҡсаһы, өс дауахана корпусы, фельдшер-акушерлыҡ пункты һәм спорт объекты төҙөл­гән. Балаҡатай районында ағас күмерен ҡаптарға тултырыу цехы, Дыуанда – ит эшкәртеү комбинаты, Ҡариҙелдә – мебель, Салауатта эсәр һыу ҡойоу цехы, Ҡыйғыла тегеү фабрикаһы, Нуриманда “Романов” тоҡомло һарыҡтар үрсетеү фермаһы эш башлаған.
Һөҙөмтәләр бар, әммә алда тағы ла етдиерәк бурыстар тора. Тап шуға ла төбәкте артабан үҫтереү йәһәтенән программаны 2020 йылға тиклем оҙайтыу өсөн саралар планы эшләнгән.
– Документ инвестициялар йәлеп итеү, етештереү үҙәктәрен киңәйтеү һәм яңыларын булдырыу, бәләкәй һәм урта эшҡыуар­лыҡ­ҡа, фермерҙарға, шәхси хужа­лыҡтарға ярҙам сараларын киңәйтеү кеүек программаларҙы үҙ эсенә ала, – тине Илшат Тажетдинов.
Әлбиттә, әле төбәктә эш дауам итә. Мәҫәлән, Бәләкәй Ыҡтамаҡ ауылында кирбес заводы терге­ҙелә, Мәсәғүттәгеһе үҙгәртеп ҡорола... Ҡыйғыла пенополистирол етештереү цехы төҙөлә, ағас эшкәртеү комплексы төҙөү күҙаллана. Инвесторҙар проекты буйынса талап ителгән ҡора­малдар һатып алына башлаған.
Ултырышта төбәктә балыҡсы­лыҡ хужалығын үҫтереү буйынса яңы етештереү проекттары мө­һим йүнәлештәрҙең береһе булыуы билдәләнде. Был йәһәттән һәр районда ошондай ойошма булдырыу күҙаллана.
Йәнә Нуриман районында йәшелсә һаҡлағыс, Дыуанда 800 башҡа иҫәпләнгән мал һимертеү майҙансығы, ит эшкәртеү, Мәсет­ле районының Ленин исемендәге ауыл хужалығы кооперативы базаһында үҙҙәре етештергән иттән ярымфабрикаттар һәм колбаса аҙыҡтары етештереү, Салауат районының Нәсибаш ауылында һөтсөлөк фермаһы төҙөү планлаштырыла.
Балаҡатай районының Айҙа­ҡай ауылында социаль-мәҙәни үҙәк, балалар баҡсаһы, мәктәп, фельдшер-акушерлыҡ пункты, шулай уҡ Мәсетле районының үҙәге Оло Ыҡтамаҡта тиҙ ярҙам станцияһы булған дауахана төҙөү ҙә ҡаралған.