Кисә Архангел районында төбәкте иҡтисади һәм социаль яҡтан үҫтереүгә арналған ҙур кәңәшмә булды. Уны Башҡортостан Президенты Рөстәм Хәмитов үткәрҙе. Тәүҙә ул райондың бер нисә ауылында булып, халыҡтың йәшәү, көнкүреш шарттары менән танышты.
Иң башта Рөстәм Зәки улы Иҫке Ырныҡшы ауылындағы йорт ҡуяндарын үрсетеү менән шөғөлләнгән фермала булып, “СЕТ” яуаплылығы сикләнгән йәмғиәтенең эшмәкәрлеге менән танышты. Әле бында 800 баш йорт ҡуяны бар. Ферманың икенсе сираты төҙөлөп бөткәс, уларҙың һанын биш меңгә еткермәкселәр. Төҙөлөшкә 12 миллион һум аҡса тотонолған, һигеҙ эш урыны булдырылған. Йорт ҡуяндары үрсетеү — малсылыҡта табышлы, әүҙем үҫкән өлкә. Был мөһим тармаҡты киң йәйелдереү өсөн яңы технологиялар ҡулланып эшләү талап ителә.
Максим Горький ауылында Башҡортостан Президенты оло йәштәгеләр һәм инвалидтар өсөн “Мәрхәмәтлек” йорт-интернатында булды. Үҙгәртеп ҡоролғандан һуң ике ҡатлы яңы бина йөҙ кешене ҡабул итеү мөмкинлегенә эйә. Әле бында иллегә яҡын кеше йәшәй. Бер, ике һәм өс урынлыҡ бүлмәләрҙә барлыҡ уңайлы шарттар ҙа булдырылған. Ял бүлмәләре, китапхана, тренажер залы, оҫтаханалар, дини йола башҡарыу бүлмәләре — һәммәһе лә өлкәндәр ҡарамағында.
Президент ауыл мәҙәниәт йортона һуғылмай китә алманы. Бинаны үҙгәртеп ҡороу, аҡса етмәгәнлектән, әле һаман тамамланмаған.
Райондың Валентиновка ауылында ла хәл итеүҙе көткән мәсьәлә етерлек булып сыҡты. Ауыл үҙәгендәге ике ҡатлы амбулатория бинаһында табип юҡ. Халыҡты фельдшер менән акушер ғына хеҙмәтләндерә. Белгес өсөн дауахана янында әҙер фатир ҙа бар, әммә кадрҙарға ҡытлыҡ ҙур. Халыҡ медицина ярҙамы алыу өсөн 20 саҡрымдағы район үҙәгенә йөрөргә мәжбүр.
Президент ауылда ағас эшкәртеүгә махсуслашҡан “Биотоп” яуаплылығы сикләнгән йәмғиәтендә лә булды. Быйыл ул тулы ҡеүәтендә эшләй башлаясаҡ, ҡырҡҡа яҡын эш урыны булдырыласаҡ.
Райондың Приуралье ауылында ла хәл итеүҙе көткән мәсьәлә байтаҡ. Президент күп фатирлы туғыҙ йортто ҡараны. Тимер юлсылар өсөн төҙөлгән торлаҡ бик насар хәлдә, инженер коммуникациялары иҫкергән, оҙаҡ йылдар капиталь ремонт үткәрелмәгән.
Рөстәм Зәки улы бындай хәл менән ҡәнәғәт булмауын белдерҙе.
— Район күп йүнәлеш буйынса артта ҡала. Халыҡтың тормош кимәле хөрт. Эш урындары менән тәьмин итеү буйынса хәл бик киҫкен. Меңәрләгән кеше ситтә эшләргә мәжбүр. Уртаса эш хаҡы — 12 мең һум тирәһе, ә был республика кимәленән күпкә түбән, — тине республика башлығы. — Шулай булғас, кешеләр тормоштан ҡәнәғәт түгел.
Кәңәшмәлә райондың башҡа проблемалары ла телгә алынды. Һуңғы йылдарҙа һыйыр малы һаны ла, ит-һөт етештереү ҙә кәмегән. Умартасылыҡ буйынса ла тейешле һөҙөмтә юҡ. Эшҡыуарлыҡ саҡ тын ала... Туризмды үҫтереү буйынса ла эш бармай. Өфөгә яҡын урынлашҡан, иҫ китмәле матур тәбиғәтле төбәктә эштең һүлпәнлеге менән һис килешә алмай республика башлығы.
— Былай йәшәргә ярамай. Эште ниҙән башлайыҡ? — тип мөрәжәғәт итергә мәжбүр булды Рөстәм Зәки улы кәңәшмәлә ҡатнашыусыларға. Президент, төбәкте үҫтереү буйынса тәҡдимдәрҙе тыңлағандан һуң, район етәкселегенә яҡын арала үҫеш стратегияһы программаһын әҙерләргә һәм уны кисекмәҫтән тормошҡа ашыра башларға ҡушты.