Кисә Өфөлә бер төркөм алдынғыларға дәүләт наградаларын тапшырыу тан­танаһы булды. Бүләклә­неүселәрҙе Башҡортостан Башлығы Рөстәм Хәмитов тәбрикләне.


– Һеҙ барығыҙ ҙа – намыҫ ҡушыуы буйынса эшләү­селәр. Туған кол­лек­тив­тарығыҙ шундай уңғандар менән ғорур­ланырға хаҡлы, – тине Рөстәм Зәки улы. – Беҙҙең республика хәҙерге ҡатмарлы заманда ла үҫеүҙән туҡтамай, күптән түгел Санкт-Петербургта булып уҙған халыҡ-ара иҡтисади форумда Башҡор­тостан инвестиция йәлеп итеү буйынса тәүге 20 төбәк иҫәбендә аталды. Беҙ һайлауҙар менән бәйле осорға аяҡ баҫабыҙ. Был ваҡытта йәмғиәттәге һәр төрлө көстәр әүҙемләшә башлай. Уңыштарға күҙ йомоп, ә кәмселектәрҙе күпертеп күрһәтергә яратыусылар ҙа булыр, моғайын. Быны тыныс ҡабул итергә кәрәк. Тормош бит ул – төрлөһө була. Беҙ барыбер ышаныслы алға барыуҙы дауам итәсәкбеҙ.
Хеҙмәт алдынғыла­рына Рәсәй Президен­ты­ның Почет грамо­таһы, Рәхмәт хаттары, II дәрәжә “Ватан ал­дындағы хеҙмәттәре өсөн” ордены миҙалы, “Башҡортостан Рес­публикаһы алдын­дағы хеҙмәттәре өсөн”, Салауат Юлаев ордендары һәм башҡа наградалар, шулай уҡ маҡтаулы исемдәр тапшырылды. Улар ара­һында Өфө моторҙар эшләү берек­мәһе вәкил­дәре лә байтаҡ ине.
– Рөстәм Зәки улы, беҙҙең предприятие тураһында Һеҙ күп беләһегеҙ, хәбәрҙар­һығыҙ, коллективтың барлыҡ мөһим сараларында ла ҡатнашаһығыҙ. Был хәл һәр мотор эшләүсе өсөн күңелгә ятышлы, рәхмәт Һеҙгә! – тине ошо берекмәнең коммерция директоры Сергей Евстафьев.
Бөтәһе илленән ашыу кеше республика Баш­лығы ҡулынан награда алыу бәхетенә иреште. Уларҙан “Башҡортостан” телерадио­тапшырыуҙар компани­яһының алып барыусыһы Гөлнур Вәлиева, “ДАСКО төркөмө” йәмғиәте директоры Александр Антонов, Рәсәйҙең Бо­йондороҡһоҙ проф­союздар федерацияһы рәйесе кәңәшсеһе Әмир­хан Сәмирханов һәм башҡалар, хеҙмәт­тәрен юғары баһа­лаған өсөн рәхмәт белдереп, киләсәктә тағы ла ҙурыраҡ яуаплылыҡ тойоп эшләргә вәғәҙә итте.