Хәбәр итеүебеҙсә, Өфөлә I медицина ассамблеяһы асылды. Уның эшендә Башҡортостан Президенты Рөстәм Хәмитовтың ҡатнашыуы оло йыйындың мәртәбәһен дә, бәҫен дә арттырҙы.
Һаулыҡ һаҡлау тармағының ҙур үҙгәрештәр һәм яңырыу алдында тороуын яҡшы аңлайбыҙ. Изге ниәттән сығып башҡарылған реформаларҙы ла республикабыҙҙағы һөнәрҙәре буйынса берләшкән егерменән ашыу йәмәғәт ойошмаһы тырышлығынан, тупланыуынан һәм килешеп эшләүенән тыш тормошҡа ашырыуы анһат түгел. Форумда ҡатнашыусылар фекеренсә, һаулыҡ һаҡлау өлкәһендәге тармаҡҡа хас проблемаларҙы хәл итеү, закондар сығарыу, экспертиза үткәреү, медицина хеҙмәткәрҙәрен хоҡуҡи яҡтан яҡлау мәсьәләләрен дә Медицина лигаһы төҙөү ярҙамында уңышлы хәл итеп буласаҡ.
Башҡортостан Президенты Рөстәм Хәмитов һаулыҡ һаҡлау тармағының “ауыртҡан” урындарын яҡшы белә. Уны бөгөн “берҙәм телефон”дың эшмәкәрлеге, табиптарға сираттарҙың ҙурлығы, льготаға эйә граждандарҙы дарыуҙар менән тәьмин итеү, тармаҡтағы коррупция һәм башҡа бихисап етешһеҙлектәр һис ҡәнәғәтләндерә алмай. Республика башлығы йыйында ҡатнашыусы медицина хеҙмәткәрҙәрен ябай халыҡҡа яҡыныраҡ булырға, уның сәләмәтлеген хәстәрләүҙә күңел йылыһын йәлләмәҫкә саҡырҙы. Профессионалдарҙың берҙәм лигаһы ойошторолоуын хуплап, Рөстәм Хәмитов уның төрлө ведомстволар менән йоғонтоло һөйләшеү алып барыусы, туплаусы, ҡапма-ҡаршылыҡлы мәсьәләләрҙе яйға һалыусы, әммә бюрократиянан алыҫ тороусы көслө берләшмә итеп күрергә теләй.
“Рәсәй Хөкүмәтенең илдәге демографик хәл менән тәрән борсолоуын яҡшы аңлайым. Әгәр ҙә беҙ бөгөн бер ни ҙә эшләмәһәк, күҙаллауҙар буйынса, илленсе йылдарға Рәсәй халҡының ныҡ кәмеп, 105 миллионға ҡалыу хәүефе бар. Тимәк, беҙ һеҙҙең менән халыҡтың сәләмәтлегенә, именлегенә ҡурҡыныс янаусы сирҙәрҙе еңеү, тәбиғи булмаған үлем менән арабыҙҙан китеү һанын кәметеү буйынса даими эшләргә бурыслыбыҙ,” – тине Президент.
Ни өсөн тармаҡҡа күберәк аҡса сарыф иткән һайын халыҡ һаны кәмей? Үҙ-үҙенә ҡул һалыу осраҡтары нилектән 60-сы йылдарҙағынан ике тапҡырға күберәк? Табиптар үҙҙәрен ғәҙелһеҙлектән, яла яғыуҙан ниңә һаҡлай алмай? Ни өсөн кадрҙар етешмәй? Төбәк башлығы форумда ҡатнашыусылар алдына һәр кемде уйландырырлыҡ етди һорауҙар ҡуйҙы һәм һәр кемгә тармаҡта тәртип булдырыуҙы үҙенән башларға кәңәш итте.