— Өлгөрбай ағай, һин телевизор, гәзит-журналдар шәхесте тәрбиәләүгә ҙур өлөш индерә, тигән фекергә нисек ҡарайһың? – тип һораны бер көн ҡусты тейешле кеше.
— Нисек тип ни, һәйбәт. Насар кешеләр хаҡында ҡарағанда, шундай көнгә ҡалырға Хоҙай ҡушмаһын, тип тәүбә ҡылаһың. Яҡшыларына һоҡланып, улар кеүек булһаң ине тигән тойғо биләп ала. Кемгәлер изгелек ҡылғы килеп китә.
— Башҡалар ҙа тап һинең кеүек икән. Ана Благовещен ҡалаһында йәшәгән Радик Әхмәтшин һуң!
…Матур бер көн. Телевизорҙан “Һөнәре буйынса иң яҡшыһы”, “500 ферма” тигән республика программаларында ҡатнашыусылар хаҡында тапшырыу бара. Уны әҫәрләнеп ҡарай 53 йәшлек уҙаман. Сюжет геройҙарының ҡайһы яҡтан булыуын, исем-шәрифен хәтерендә ҡалдыра. “Ҡара әле, шундай шәп, эш тип янып торған егеттәргә мин дә ярҙам итә алам бит”, – тип уйлай. Сауаплы ғәмәлде оҙаҡҡа һуҙмай Әхмәтшин әфәнде. Уларҙың телефон һандарын йәһәт таба.
Бығаса ул агропредприятие етәксеһе булып эшләгән. Ауыл хужалығы өлкәһендә анһат ҡына аҡса һәрмәргә шымарып алған ир һәр нәмәнең рәт-сиратын яҡшы белә. Итәғәтле итеп иҫәнлек һораша, үҙенең ниәтен әйтә:
— Республика Хөкүмәтендә эшләйем. Ҡарап, күҙәтеп торам, эшегеҙ шәп бара, афарин! Тап һеҙҙең кеүектәр илде туйҙыра. Президентыбыҙ ҙа һеҙҙе хуплай. Беҙ ҙә уңғандарға ярҙам итергә тырышып торабыҙ. Бына әле һеҙҙең фермер хужалығына бер трактор бирергә булдыҡ. Документтарҙы фәлән-фәлән көндә ауыл хужалығын үҫтереү мәсьәләләренә арналған кәңәшмәлә тапшырасаҡбыҙ…
“Министр” артабан бәйләнештә булыр өсөн телефонын да яҙып бирә.
— Ярай, Өфөнөң Калинин районы хакимиәте алдында осрашырбыҙ.
— Рәхмәт!
Билдәләнгән көндә “йомарт министр” етәксене хакимиәт бинаһы алдында ҡаршы ала. Килешле итеп кейенгән, галстук таҡҡан, ҡулына ыҫпай ғына портфель эләктергән әфәнде, ысынлап та, ҡойоп ҡуйған министр инде. Ул иҫәнлек-һаулыҡ һорашҡас, йөҙөнө хәстәрлекле төҫ сығарып, кемделер әрләй.
— Һай, ошоларҙы! Кәңәшмәне башҡа көнгә күсергәндәр ҙә ҡуйғандар. Әйтеү юҡ, иҫкәртеү юҡ. – Унан кеселекле итеп ғәфү үтенә.
— Ярай, әллә ни зарар юҡ! Былай трактор алыуға барлыҡ документтар әҙер. Бының өсөн бары алдан 35 мең һум дәүләт пошлинаһы түләргә кәрәк булыр.
Бына-бына тракторлы булыуға кем ҡыуанмаһын инде! Был ғына аҡса пүстәк инде. Фермер Әхмәтшин әфәнденең усына ул һораған сумманы сумдыра. Әлбиттә, бындай алыш-биреш һәр ваҡыттағыса шартына килтереп башҡарыла. “Министр” аҡса түләү һәм техника алыу хаҡында уның ҡулына ниндәйҙер ҡағыҙ ҙа тоттора.
Көн артынан көн үтә. Фермер хужалығы етәксеһе “министр” биргән адрес буйынса билдәләнгән урынға трактор алырға килә һәм күрһәтелгән йортто эҙләп хәлдән тая. Кешеләрҙән:
— Был тирәлә ундай бина юҡ, – тигән яуапты ғына ишетә.
Бәй, был ни ғиллә! Грант, трактор хаҡында ла ишеткән-белгән әҙәм юҡ. Шунда ғына фермер үҙенең ярыҡ ялғашҡа ултырып ҡалғанын аңлап ҡала.
“Йомарт министр” шундай алым менән йәһәт кенә икенсе фермерҙы ла “тракторлы” итеп, ҡулына 67 мең һум аҡсаны төшөрә.
Баҡһаң,”министр” вазифаһына үрләгәнсе Радик Әхмәтшин шаҡтай ғына оҫтарыу баҫҡыстарын үткән икән. Ун йыл элек булмаған һөт заводын эшҡыуарҙарға “осорған”. 2012 йылда ул үҙен республика Президенты Хакимиәте хеҙмәткәре итеп танытып, байтаҡ ҡына хужалыҡтарға ташламалы хаҡҡа техника “биргән”. Ул саҡта уның “фиҙакәр хеҙмәтен” иркен бер йылға шартлы сикләү менән билдәләгәндәр.
Әлбиттә, бындай тырышлыҡ “эҫе” мәлендә лайыҡлы баһаланырға тейеш. Әхмәтшинде лә мәхрүм итмәнеләр. “Йомарт министр”ҙы ике йыл ярымға тимер рәшәткәле “ял йортона” оҙаттылар. Бахыр хәҙер унда телевизорға әйләнеп тә ҡарамай, тиҙәр.