Ниһайәт, 1991 йылда башланған төҙөлөш бер йылда тамамланды. Уҡытыусы булһаҡ та, район етәкселеге һорауы буйынса балта оҫтаһы эшен дә башҡарҙыҡ. Ауылдағы йәштәрҙән бригада төҙөнөм. Яңы мәктәпте йыһазлау өсөн Өфөнән мебель, ҡорамал ташыныҡ. Заманса хеҙмәт дәрестәре үткәреү өсөн инструменттар, станоктар килтерҙек. Ҡыҙ балалар өсөн 15-ләп теген машинаһы урынлаштырҙыҡ. Аҙау урта мәктәбенә яңы автобус, "Т-75" тракторы тапшырылды. Яҡын-тирәләге ауылдарҙан ата-әсәләр, тантанаға килеп, изге теләктәрен әйтте.
Яңы мәктәптә яңы уҡыу йылы башланды. Бина йылы, яҡты, иркен, белем алыу өсөн махсус кабинеттар бар. Ҡыҙғанысҡа ҡаршы, ноябрь айының тәүге көндәрендә үк йылытыу системаһы сафтан сыҡты. Шатлығыбыҙ оҙаҡҡа барманы, һыуыҡ булыу сәбәпле, уҡытыу туҡтатылды. Бөтә ғәйепте мәктәп директорына япһарҙылар. Бинаны ҡабул итеп алған актта 30 кешенең ҡултамғаһы бар, улар нимә ҡараған, тикшергән? Яйлап мәктәптең милке урлана башланы.
Тиҙҙән бер төн эсендә яңы трактор һабаны менән бергә юҡ булды. Яңы автобусты күҙ буяу өсөн ут һүндереү машинаһы итеп ултыртып ҡуйҙылар. Бар нәмәне бөтөрөүе шулай тиҙ ҙә, еңел дә икән... Мәктәптең милкенә инвентаризация үткәрелмәне, кем нисек етте шулай "эшләп", уҡыу йортоноң элекке абруйын төшөрҙө.
Ата-әсәләр балаларын Аҙауға уҡытырға ебәрмәй башланы. Ҡулайлаштырыу тип йөрөтөлгән күренеш тә булышлыҡ итте. Аҙау урта мәктәбе уҡыусыларын 18 саҡрым алыҫлыҡтағы Оҙондар ауылына йөрөтөп уҡыталар. Балаларҙы иртәнге 8-се яртыла уятып, автобус менән юлға сығаралар.
Уҡыусылар юл йөрөүҙән ялҡты, белем ҡеүәһе түбәнәйҙе. Бына шулай ситтән күҙәтеп, уңайлы шарттарҙы көтөп йөрөгәндәр, етәкселеккә үрләп, мәктәпте тарҡатты. Буш торған класс бүлмәләрен клуб, медпункт, почта бүлексәһе, китапхана иттеләр. Балалар баҡсаһында тәрбиәләнеүселәр ҙә мәктәпкә күсенергә йөрөй. Минеңсә, яңы мәктәпте тарҡатҡан етәкселәрҙе яуаплылыҡҡа тарттырырға кәрәк. Элек алты йөҙҙән ашыу бала иҫке мәктәптә белем алды, ә яңыһында — ни бары утыҙға яҡын. Гөрләп торған мәғариф усағының һүнә барыуына күңел шул тиклем әрней, белһәгеҙ ине...