Мәскәүҙә Рәсәй Премьер-министры Владимир Путин Башҡортостан Президенты Рөстәм Хәмитов менән осрашыу үткәрҙе. Унда һүҙ республиканың һуңғы йылдағы социаль-иҡтисади үҫеше тураһында барҙы. Әйтергә кәрәк: һөҙөмтәләр насар түгел, ә сәнәғәт, ауыл хужалығы, төҙөлөш тармаҡтары буйынса күрһәткестәр тотош ил буйынса уртаса кимәлдән юғарыраҡ.
Башҡортостан Президенты Рөстәм Хәмитов йыл йомғаҡтары тураһында һөйләне һәм тулайым төбәк продукты буйынса республиканың 110 процент кимәленә сығасағын белдерҙе.
— Быйыл иһә тулайым төбәк продукты мотлаҡ 1 триллион һумға етәсәк, — тине Рөстәм Зәки улы. — Сәнәғәт етештереүе индексы ноябргә ҡарата 109,7 процент тәшкил итте, дөйөм һөҙөмтә тағы ла юғарыраҡ буласаҡ. Предприятиелар килеме буйынса күрһәткестәребеҙ һәйбәт: уларҙың 80 проценттан ашыуы табышлы эшләй.
Ике йыл элекке ҡоролоҡтан һуң ауыл хужалығындағы хәлдәр яйға һалынған. Хәҙер был тармаҡ тотороҡло. Республика аграрийҙары былтыр 3 миллион тоннанан ашыу иген йыйып алды, ике йыллыҡ аҙыҡ запасы тупланы. Шуға күрә мал ҡышлатыуҙа бер ниндәй ҙә хәүеф юҡ. Президент әйтеүенсә, киләһе сәсеү кампанияһы менән дә проблемалар күҙалланмай, сөнки былтыр ауыл хужалығы эшсәндәренә яҡшы ярҙам күрһәтелгән.
Төҙөлөш комплексының уңыштары ла насарҙан түгел.
— Тармаҡ терелде, киңәйҙе һәм яҡшы эшләй. Пландағы 2 миллион 100 мең квадрат метр торлаҡ сафҡа индерелде, шуның 75 проценты — шәхси йорттар, — тине Рөстәм Хәмитов. — Беҙ ҡасабалар төҙөйбөҙ, ауылда йәшәүсе халыҡ та йорттарҙы әүҙем һала. Ундайҙарға ярҙам күрһәтәбеҙ. Киләһе йылға — 2 миллион 350 мең, ә 2015 йылға 3 миллион квадрат метр торлаҡты сафҡа индереү бурысын ҡуйҙыҡ.
Президент шулай уҡ инвестиция йәлеп итеү өлкәһендәге эшмәкәрлек, тышҡы сауҙа әйләнеше күләме, төбәктә эш хаҡының 12 процентҡа артыуы тураһында әйтте. Республикала халыҡтың эш хаҡы Рәсәйҙәге уртаса кимәлде ҡыуып етеп килә.
Һөйләшеү барышында белем биреү һәм мәктәпкәсә мәғариф учреждениелары хеҙмәткәрҙәренең эш хаҡын күтәреү темаһы ла ҡаралды.
— Быйыл 52 балалар баҡсаһы төҙөйәсәкбеҙ. Бындай күләм хатта совет осоронда ла булманы, — тине Рөстәм Зәки улы. — Былтыр иһә 10,5 мең балаға урын булдырылды. Төрлө юлдар менән проблеманы хәл итергә тырышабыҙ.
Һаулыҡ һаҡлау тармағын үҫтереү, дауаханалар торошо, тармаҡ хеҙмәткәрҙәренең эш хаҡы тураһында ла һүҙ булды.
— Власть халыҡҡа яҡыныраҡ булырға тейеш. Эшләйбеҙ, кешеләрҙе ишетергә тырышабыҙ, уларҙың көндәлек проблемаларын хәл итәбеҙ. Был торлаҡ-коммуналь хужалыҡ, ихата һәм урамдарҙы төҙөкләндереү, транспорт мәсьәләләрен хәл итеү һәм башҡаларға ҡағыла, — тине Башҡортостан Президенты. — Ҡыҙыҡлы тәжрибәбеҙ бар: күп фатирлы өйҙәрҙә 12 мең йорт комитеты булдырҙыҡ. Был кешеләр халыҡ мәнфәғәтендә эшләй. Уларға хатта аҙмы-күпме аҡса ла түләйбеҙ.
Спорт өлкәһендә лә эштәр һәйбәт. 2012 йылда Өфөлә йәштәрҙең хоккей буйынса донъя чемпионаты үтәсәк.
— Быйыл йәй Өфөлә биатлон буйынса донъя чемпионаты ойоштороласаҡ, уға ныҡлап әҙерләнәбеҙ. 2013 йылда балаларҙың халыҡ-ара ҡышҡы уйындары, йәғни 10 — 14 йәшлектәр өсөн кесе Олимпиада буласаҡ. Унда меңләп кеше, утыҙ ил ҡатнашасаҡ, — тине Рөстәм Хәмитов.