Шаяртыу хаҡы

— “Ҡунаҡһарай”ға, “Ял”, “Элекке таныш” кафеларына, “Арсенал” кинотеатрына шартлатҡыс һалғандар!

Нефтекама ҡалаһының эске эштәр бүлегенә бер-бер артлы ошондай шомло хәбәрҙәр килгәс, бөтәһе аяҡҡа баҫа. “Ашығыс ярҙам”, янғын һүндереү машиналары хәрәкәткә килә. Полиция хеҙмәткәрҙәре хәүефле биналарҙы ҡамап ала, кешеләр тыныс урынға сығарыла, китә һәр бер мөйөштө тикшереү. Бәхеткә күрә, бер ниндәй ҙә ҡурҡыныс әйбер табылмай.
Тәртип һаҡсылары “шаяртыусы”ны тиҙ асыҡлай: ул 37 йәшлек ир була. Шаяртыу хаҡы бик ҡиммәткә төшмәксе. Ялған шылтыратыу өсөн уға өс йылға тиклем төрмә срогы янай. Бынан тыш, “бомбаны эҙләү өсөн” киткән сығымды ла кеҫәһенән сығарып түләргә тура киләсәк.

Тишек кәмәгә
кем ултыртты?

Һай, рәхәт заман тыуҙы! Үҙеңә кәрәк әйберҙе өйөңдән сыҡмайынса ла алырға була хәҙер.

Өфөләге беренсе курс студенты интернет-магазиндан үҙенә затлы телефонға заказ бирә. Һөйгәнен дә онотмай – уны ла ҡиммәтле бүләк менән ҡыуандырырға уйлай. Бының өсөн егеттән алдан уҡ махсус иҫәпкә 17 мең һум аҡса күсереүҙәрен һорайҙар, ә тауарҙы “Рәсәй почтаһы” аша ебәрергә вәғәҙәләйҙәр. Бары ике аҙна ғына көтөргә кәрәк.
Билдәләнгән ваҡыт үтә, ә посылка юҡ та юҡ. “Мәрхәмәтле” әҙәмдәргә шылтыратыу ҙа файҙаһыҙ – телефондары пипелдәп кенә тик тора. Хәҙер инде тишек кәмәгә ултыртҡандарын яҡшы аңлаған егеткә полиция хеҙмәткәрҙәренә мөрәжәғәт итеүҙән башҡа сара ҡалмай.

Мышы ите тәмлеме?

Белорет ҡалаһының эске эштәр бүлегенә Тирлән ауылында берәүҙең йортонда мышы ите булыуы хаҡында хәбәр еткерәләр.

Хоҡуҡ һаҡсылары билдәләнгән адрес буйынса юлға сыға, ғәйеплене таба. Һорау алыу башлана. 27 йәшлек ир:
– Ҡышҡылыҡҡа ит әҙерләнем, әҙерәген ҡалалағы туғандарыма күстәнәс итеп ебәрермен тигәйнем, – тип яуаплай.
– Ә ҡайҙа аттың?
— Ҡайҙа булһын, урманда инде!
Ауылдан 26 километр алыҫлыҡтағы төпкөлгә атта ғына барып етергә мөмкин. Шулай ҙа йыбанмай тәртип һаҡсылары – һунарсының атын егеп, юлға сығалар. Аҡланда улар ике мышының баш-тояғын күрә. Ҡоралға ла һәләк бай икән браконьер – дүрт мылтығы бар, шуның икәүһе теркәлмәгән, береһен үҙе әтмәләгән.
Ғәйеплегә ҡарата енәйәт эше асылған. Хәҙер уны штраф менән “һыйларҙары" көн кеүек асыҡ. Бынан һуң бисараның “урман һыйырҙары”на ҡарағыһы ла килмәҫ, моғайын.

“Ен эйәләгән”

– Почтаға сыҡҡан арала фатирымдан телефоным ғәйеп булған!
– Өйөмдән курткамды сәлдергәндәр!
– Сумкамды таба алмайымсы, әллә өйгә ен эйәләгән инде!

Һуңғы ваҡытта Октябрьский ҡалаһында шундайыраҡ ялыуҙар менән полиция бүлегенә мөрәжәғәт итеүселәр йышайҙы.
Ысынлап та, ҡайһы ваҡытта күршеләргә, почтаға йә магазинға сыҡҡан арала ишекте бикләп тормайбыҙ шул. Ә уғрыларға шул ғына кәрәк.
Кемдең эше булыуы мөмкин? Әлбиттә, ҡала һынлы ҡалала ҡараҡты табыуы анһат түгел. Шулай ҙа полиция хеҙмәткәрҙәре уғрының эҙенә төшә – ул 40 йәштәрҙәге Руслан Иванов була. Ир урлашҡаны өсөн бығаса бер нисә тапҡыр хөкөм ителгән.
Руслан үҙ ғәйебен танмай: асыҡ, бикләнмәгән ишектәрҙе һағалап ҡына йөрөй ҙә бесәй кеүек шым ғына инеп, арыуыраҡ күренгән әйберҙәргә айыу майы һөрткән икән. Кейемдәрҙе, телефондарҙы осһоҙораҡ хаҡҡа башҡа кешеләргә осорған, документтарҙы, янсыҡтарҙы, банк карталарын сүп һауыттарына быраҡтырған.
Хәҙер “фатир таҙартыусы”ның үҙенең намыҫын таҙартырға ваҡыт, ти тәртип һаҡсылары.