Ял көндәрендә Рәсәй һәм Башҡортостан кешеләре Халыҡтар берҙәмлеге көнөн билдәләне. Илебеҙҙә сағыштырмаса яңыраҡ — 2005 йылда ғына барлыҡҡа килгән датаны байрам итеүҙең аныҡ ҡына тәртибе булмаһа ла, ул онотолмай. Республикала байтаҡ ҡына ижтимағи-сәйәси, мәҙәни һәм спорт саралары үткәрелде.

Ил Президенты Владимир Путин төбәгебеҙ башлығы Рөстәм Хәмитовҡа ҡотлау телеграммаһы ебәргән. Унда: “Был байрам Рәсәй яҙмышындағы һынылыш ваҡиғаларына алып ҡайта, патриотизм, гражданлыҡ һәм күп милләтле халҡыбыҙҙың берҙәмлегенең быуаттар һуҙымында дауам иткән йолаларын хәтерләтә. Беҙ бөйөк тарихыбыҙға лайыҡ булырға, рухи берҙәмлек хисен һаҡларға, ата-бабаларыбыҙҙың еңеүҙәрен һәм хеҙмәт бейеклектәрен онотмаҫҡа тейешбеҙ. Ватаныбыҙ мәнфәғәтендә лайыҡлы хеҙмәт итергә. Һеҙгә эшегеҙҙә уңыштар һәм яҡшылыҡ теләйем”, — тиелә.
Октябрь-ноябрь айҙарында барлыҡ мәктәптәрҙә лә тиерлек “4 ноябрь — Халыҡтар берҙәмлеге көнө” тип исемләнгән китап һәм матбуғат күргәҙмәһе әҙерләнде. “Аҡ йылға” балалар экология-биология үҙәгендә “Башҡортостан халыҡтары әкиәттәре, легендалары һәм риүәйәттәре” тип аталған тыуған яҡты өйрәнеү конкурсы үтте. 32-се балалар-үҫмерҙәр спорт мәктәбендә “Мини-футбол — мәктәпкә” проекты ярҙамында тормошҡа ашырылған турнир ойошторолдо. Республиканың Хәрби Дан музейында байрам сиктәрендә “Сәнғәттәр төнө” үткәрелде.