1 октябрҙә Башҡортостан Президенты Рөстәм Хәмитов Парижда ЮНЕСКО-ның штаб-фатирында “Башҡортостан — Рәсәй ынйыһы” тип исемләнгән презентацияла ҡатнашты.

Әлеге күргәҙмә Башҡортостандың ЮНЕСКО менән хеҙмәттәшлек итеүенә ун биш йыл тулыуға арналған. Ошо йылдар дауамында республика ЮНЕСКО хәрәкәтенә әүҙем ҡушылды, күп эштәр атҡарып өлгөрҙө. “Башҡортостан — Рәсәйҙең иң матур төбәктәренең береһе. Республикала мәғариф, фән, мәҙәниәт кеүек төшөнсәләр юғары баһалана. Беҙҙең төбәк донъяға Рудольф Нуриев, Владимир Спиваков, Сергей Аксаков кеүек бөйөк шәхестәрҙе биргән. Артабан да ойошма менән тығыҙ бәйләнештә буласаҡбыҙ”, – тине республика етәксеһе үҙенең сығышында.
Презентациянан һуң Рөстәм Хәмитов ЮНЕСКО-ның генераль директоры Ирина Бокова менән осрашҡан. “Төбәктә йәшәгән халыҡтарҙың мәҙәни төрлөлөгөн һаҡларға тырышыуығыҙҙы юғары баһалайбыҙ. Донъяла кеше ҡиммәттәре үҙгәргән ваҡытта тамырын, тарихын белгән халыҡтарҙың үҙ йөҙөн һаҡлап ҡалыуы мөһим. Беҙ Башҡортостан менән хеҙмәттәшлекте тағы ла нығыраҡ әүҙемләштереү яғында”, – тип билдәләгән Ирина Бокова. Осрашыу мәлендә ЮНЕСКО менән Башҡортостан Республикаһы араһында коммюникеға ҡул ҡуйылған.
Башҡортостан Президенты Рөстәм Хәмитов Францияның “Парламент” журналына интервью биргән. Уның тексы менән Президенттың сайтында танышырға мөмкин.