Гәзиттең сайтына көндән-көн ҡыҙыҡһыныу арта. “Бәйләнештә” социаль селтәрендәге битебеҙҙә лә дуҫтарыбыҙҙың һаны күбәйҙе. “Башҡортостан”дың сайтына көн һайын ике йөҙҙән ашыу кеше инә. Уларҙың яртыһы тиерлек беҙҙең әүҙем блогерҙарыбыҙ, баҫмабыҙҙың ысын дуҫтары, уның бөгөнгөһө, киләсәге өсөн янып-көйгән кешеләр. Күңеленә хуш килгән мәҡәләләргә фекерҙәрен яҙып ҡалдырыусылар байтаҡ. Сайтты эшебеҙҙең лакмус ҡағыҙы һымаҡ күрәбеҙ, сөнки ҡыҙыҡлы, гәзит уҡыусыны йәлеп иткән мәҡәләләрҙең иҫәбе шунда уҡ күренә.

Һуңғы айҙа сыҡҡан мәҡәләләрҙең иң уҡымлыларына айырым туҡталып китәйек. “Телгенәм-бергенәм” махсус битен гәзит уҡыусыларыбыҙ көтөп ала һәм ҡыҙыҡһынып уҡый. Мәҫәлән, Өфө ҡалаһынан Т. Ҡунаҡбаев (2012, 16 март) Ф. Юнысованың “Бөйөк шағирҙың оранына урын юҡмы?” исемле мәҡәләһенә ҡарата үҙ фекерен белдергән. Бында һүҙ республикала, баш ҡалала бөйөк әҙиптәрҙең ялҡынлы һүҙҙәрен элмәү тураһында бара. Авторҙы сайтыбыҙҙың әүҙем блогеры Батырхан да хуплаған: “Шәп тема күтәргән Ҡунаҡбаев! Хөрмәтле редакция хеҙмәткәрҙәре! Ошо эште еренә еткереүҙә һеҙ ҙур роль уйнай алаһығыҙ. Ҡала хакимиәте, етәкселәр менән һөйләшеү, уларҙан рәсми яуап алыу ҡулығыҙҙан килә бит. Эшләгеҙсе ошо эште! Рәми Ғариповтың шиғырын уҡып үтеү үҙе ҙур тәрбиәүи мәктәп тә инде. Эш ҡушып ята был Батырхан тимәгеҙ, был – оло үтенес”, – тигән. Рәшит Кәлимуллиндың “Туҙан булып оса Урал ҡаялары…” тигән мәҡәләһенә “Уҡыусы” тип теркәлгән блогерыбыҙ былай тип яҙа: “Хөрмәтле журналист! Һеҙ тырышып мәҡәлә яҙғанһығыҙ. Артабан нимә булыр? Ниндәйҙер сара күрелһен өсөн чиновниктар менән һөйләшеү алып барасаҡһығыҙмы? Мәҡәлә миңә оҡшаны, ләкин уның һөҙөмтәһе булырмы?” – тип һорай. Батырхан, “Уҡыусы”, был йүнәлештә эштең туҡтағаны юҡ. Һәр тәнҡит мәҡәләһенә, “Халыҡ тауышы”, “Хат юлға саҡыра” һәм башҡа рубрикалар аҫтында баҫылған, көнүҙәк мәсьәләләрҙе күтәргән материалдарҙы район хакимиәттәренә, ойошмаларға ебәрәбеҙ, яуап алабыҙ. Уларҙың барыһы ла гәзит битендә донъя күрмәй, әлбиттә. Шулай ҙа эш бара.
Профессор Миңһылыу Усманованың “Телгенәм-бергенәм” махсус битендә сыҡҡан (2012, 27 апрель) “Киләсәктә була торған төшөнсә телдә ҡайһылай бирелә?” тигән мәҡәләһе уҡыусыларыбыҙҙа ҙур ҡыҙыҡһыныу уятҡан. “Гәзиттең (ниндәй баҫма икәнен яҙмайым) бер һанында ғына күплек ялғауы 73 урында артыҡ яҙылған! Урыҫса фекерләп яҙғанға шулайҙыр ул. “Башҡортостан” гәзите башҡа баҫмаларҙан айырмалы телгә иғтибарҙы көсәйтте. Шуға ҡыуанып бөтә алмайым”, – тип яҙа “Уҡыусы” исеме аҫтында теркәлгән блогерыбыҙ. Батырхан да был фекергә ҡушыла: “Иң йәнгә тейгәне – хәбәрселәрҙең күплек ялғауын дөрөҫ ҡуймауы. Был теманы күтәреп йәтеш иттегеҙ әле. Мәҫәлән, “республикала санитар бүлектәр юҡтар”, “күп сәбәптәре бар”, “хаталар китәләр” тигән һүҙбәйләнештәрҙе уҡығанда ныҡ йән көйә”, – тигән. Йәнле аралашыуға ҡушылған Гүзәл Ситдиҡова ла үҙ фекере менән уртаҡлашҡан: “Күплек ялғауын һандар күрһәтелгәндә лә рәхәтләнеп яҙып ҡуялар. Мәҫәлән, 5 ҡарғалар осоп бара. Миллион кешеләр килгәндәр. Ике йөҙ һыйырҙар. Телебеҙҙә исем һандан алда килгәндә генә күплектә ҡулланылғылай. Мәҫәлән, ҡарғалар 5-әү ине. Кешеләр миллион ине”.
“Эшҡыуар” рубрикаһы аҫтында сыҡҡан мәҡәләләр ҙә ҡыҙыҡһыныу уята. “Ҡоланбаев” тип теркәлгән уҡыусы “Һай күңелле лә һуң ошондай мәҡәләләрҙе уҡыуы! Фермерҙарға Аллаһ ярҙам бирһен!” – тип яҙа.
Тыл һәм хеҙмәт ветераны Әнүәр Туҡтамышевтың “Башҡорт баҫмаларына ярҙам кәрәк” мәҡәләһе лә ҡыҙыҡһыныу тыуҙырған. Батырхан мәҡәлә аҫтына былай тип яҙған: “Ауыҙыңа бал да май, Әнүәр ағай! Мәҡәлә – шәп. Гәзиттең тиражын арттырыуҙа, уҡытыусылар, бигерәк тә класс етәкселәре, клуб хеҙмәткәрҙәре ҙур эш башҡара ала. Гәзит йөкмәткеһе буйынса әҙерләнгән КВН, “Иң мәғлүмәтле уҡыусы” кеүек темаларға кисә ойошторорға, баҫма күтәргән ҡыҙығыраҡ темаларға инша яҙҙырырға, әңгәмә үткәрергә мөмкин бит. Ошо уҡ эште ололар менән клубта ла ойоштороп була. Әйткәндәй, башҡорт телендә диктант яҙҙырыуҙы ойоштороу ҙа гәзиткә иғтибарҙы йәлеп итмәҫ инеме икән? Уйлашайыҡ әле”.
“Баймаҡҡа – ит комбинаты, Темәскә – һөт заводы” тигән баш менән сыҡҡан хәбәр көньяҡ-көнсығыш райондарҙа йәшәүселәрҙе айырыуса ныҡ ҡыҙыҡһындырған. Был яҙма менән 50 кеше танышҡан. Сәриә Рамаҙанованың “Көҙ миҙгеле танһыҡ миңә” тип аталған мәҡәләһе йырсы Нурия Абдуллина тураһында һөйләй. Уны ла йылы ҡабул иткәндәр.
Уҡыусыларыбыҙ Илдар Ғәбитовтың сканвордтарын көтөп ала. Сайтта: “Хөрмәтле Илдар! Мейе эшмәкәрлеген үҫтереүҙә, хәтерҙе ҡотайтыуҙа һеҙ төҙөгән сканворд, башватҡыс, логогриф ярҙам итә”, – тип яҙып ҡалдырғандар.
Интернет селтәренә тоташҡан һәр уҡыусыбыҙ өсөн сайтыбыҙ асыҡ. Бында баш мөхәррир, хәбәрселәр һәм уҡыусылар араһында йәнле һөйләшеү, фекер алышыу бара. Бергә булайыҡ, дуҫтар! Күҙәтеүҙе блогерыбыҙ Илдандың һүҙҙәре менән тамамлағы килә: “Башҡортостан”ды асам да эҙләйем, асам да эҙләйем. Ә ул һаман юҡ. Рәшит Кәлимуллин тигән азамат ауыл хужалығы һәм әхлаҡ темаларына шәп мәҡәләләр яҙа торғайны. Тағы берәй нәмә ижад итмәнеме икән тип ҡараған булам. Ә ул яҙмай ҙа яҙмай. Зарыҡтырма инде, Рәшит, яҙ әле!”