“Берҙәм Рәсәй”ҙең “Таҙа ил” партия проекты мониторингы асыҡлауынса, Рәсәйҙең күп кенә төбәктәрендә идарасы компаниялар сүп-сар сығарған өсөн хаҡты ике тапҡырға арттырып түләттерә икән. Был хаҡта Дәүләт Думаһының Экология һәм тирә-яҡ мөхитте һаҡлау буйынса комитеты рәйесе Владимир Бурмаков хәбәр итте. Хоҡуҡ боҙоуға илдең 20 төбәгендә юл ҡуялар икән. Ә Башҡортостанда хәл нисек?



Ҡаты коммуналь ҡалдыҡтарҙы ташыған өсөн икеләтә сумма күрһәтелгән квитанция ебәреүҙәре ихтимал булыуы хаҡында Баш­ҡортостан Башлығы вазифаһын ва­ҡыт­лыса башҡарыусы Радий Хәбиров был­тыр йыл аҙағында уҡ иҫкәрткәйне инде.

Партияның Генераль Советы секре­тарының беренсе урынбаҫары, Дәүләт Думаһы депутаты Ольга Баталинаның һүҙҙәренә ҡарағанда, ошо проблема һаман булһа хәл ителмәгән төбәктәрҙә идарасы компаниялар квитанциянан сүп-сар сығарыу буйынса хеҙмәтләндереү тура­һындағы юлды алып ташлай, ә сумманы ҡалдыра. “Тимәк, был хеҙмәт­ләндереү күрһәтелгән һәм шул уҡ сумма күрһәтелгән квитанцияны айырым ебәреү мөмкинлеге тыуа”, – ти Баталина.

Быйылғы 1 ғинуарҙан Рәсәйҙә ҡаты ком­муналь ҡалдыҡтар буйынса күр­һә­телгән хеҙмәттең яңы системаһы ғә­мәлгә ашырыла башланы. Төбәк опе­ра­тор­ҙарының бурысы – ошондай ҡалдыҡ­тарҙы ташыу, эшкәртеү, зарарһыҙ­ландырыу, күмеү. Уларҙың хеҙмәтенә түләү идарасы компанияның торлаҡ йортто хеҙмәтлән­дереүенән тыш башҡарыла, тариф та айырым билдәләнә.