Приют тәрбиәләнеүселәре Республика йортонда булды.

Башҡортостан Башлығы вазифаһын ваҡытлыса башҡарыусы Радий Хәбировтың саҡырыуы буйынса Республика йортона “Күңелем ҡылы сыңлай” әҙәби конкурсында лауреат булған приют тәрбиәләнеүселәре килде.

Башҡортостан Республика­һы­ның 100 йыллығына арналған конкурсты “Фәрештә-Юл япрағы” ха­лыҡ­тың аҙ яҡланған ҡатлам­да­рына ярҙам күрһәтеүсе хәйриә фонды ойошторҙо. Унда Белорет, Күгәрсен, Бишбүләк, Ейәнсура, Әлшәй, Тәтешле, Хәйбулла, Саҡ­мағош һәм Дүртөйлө райондарынан 183 бала ҡатнашты. Бүләкләү тантанаһы Әхмәтзәки Вәлиди исе­мендәге Милли китапханала үтте.

Лауреаттарҙың береһе – 12 йәш­лек Айгүзәл Аҙнабаева менән Радий Хәбиров Ейәнсура районына эш сәфәре барышында Иҫән­ғол ауылындағы балалар һәм үҫмерҙәр өсөн социаль приютта танышып, уны Республика йортона ҡунаҡҡа саҡырғайны. Төбәк етәксеһе балаларға үҙенең эш бүлмәһен, осрашыуҙар өсөн кесе залды, оператив кәңәшмәләр залын күрһәтте һәм эшмәкәрлеге тураһында һөйләне.



Төбәк етәксеһенән бөтә балалар Яңы йыл бүләктәре һалынған мәктәп биштәрҙәре алды, ә Айгүзәл Аҙнабаева Радий Хәби­ровҡа үҙе төшөргән уның портретын бүләк итте.