Ошондай матур әйтем бар халыҡта. Был һүҙҙәрҙең хаҡлығына шик белдергән, бәхәсләшергә теләгән кеше лә юҡтыр бөгөн. Ҡатын-ҡыҙҙарыбыҙ — йорт усағын, ғаилә именлеген һаҡлаусы ғына түгел, киләсәгебеҙҙе дауам итерҙәй сәләмәт быуын тәрбиәләүгә, тормош дилбегәһен дөрөҫ тотоп, заманға яраҡлашып йәшәй белеүгә ҙур өлөш индереүсе лә. Ҡатмарлы, шаулы заманда йәшәүебеҙ ҙә гүзәл зат иңенә етди яуаплылыҡ, өҫтәмә мәшәҡәттәр һала. Шулай ҙа улар бер ҡыйынлыҡһыҙ, зарһыҙ үтәй үҙ бурысын.


Бөгөнгө һүҙебеҙ ҙә ҡар өҫтөндә ҡаҙан ҡайнатыр уңған, гүзәл ҡатын-ҡыҙҙарыбыҙ хаҡында. Уларҙың бар ергә лә өлгөр, егәрле булыуын үҙ­ҙәренең эштәре, ҡаҙаныштары, еңеүҙәре күрһәтһә, мал тотоп, баҡса үҫтереп, бынамын тигән балалар тәрбиәләүе иһә уңған хужабикә булыуҙары хаҡында һөйләй.
Беҙҙең иң мөһим һәм маҡтаулы бурысыбыҙ – әсә булыу. Ҡатынды яҡшы күрһәткән – алдындағы ба­лаһы, һыйырҙы яҡшы күрһәткән – артындағы та­наһы, тиҙәр халыҡта. Әсә иң беренсе сиратта үҙе­нең йөрәк йылыһын, һөйөүен балаларына, иренә бирә белергә тейеш. Өйөн таҙа, бөхтә итеп тотоп, тәмле-тәмле ризыҡтар бешереп, ғаиләһен табынға йыя белһә, был — ҙур бәхет. Бөгөн ауылда өлгөлө, матур йәшәгән ғаиләләр бик күп, уларҙа маҡсатҡа ынтылыусан, сәләмәт һәм тәрбиәле балалар үҫә. Ә тәрбиәле бала – ул алтындан да ҡиммәт байлыҡ, уны донъялағы бер ниндәй зиннәткә лә алмаштырыу мөмкин түгел. Бына улар — “Әсәлек даны” миҙалы менән бүләкләнгән донъя тотҡаһы ҡатын-ҡыҙҙа­ры­быҙ — Йәмилә Усманова, Вәҙиға Мөхәмәтғәлина, Дил­бәр Әфләтунова, Нажиә Ғәлина, Зифа Насир­йәнова һәм башҡа бик күптәр.
Ошо данлы, маҡтаулы әсәйҙәрҙең юлын күп йәш әсәйҙәр дауам итә. Зөлхизә Ғәйнуллина, Резеда Әҙел­мырҙина, Гөл­нара Усманова ярҙамсыһыҙ ҡал­ған ту­ғандарының балаларын үҙ ҡанат­тарына алды.
Беҙ, әсәйҙәр, киләсәгебеҙҙе тәрбиә­ләй­беҙ. Быны, балалар – беҙҙең күрәсәк, тип тә аңларға кәрәк. Яман бала өйгә һыймаҫ, өйҙән сыҡһа, илгә һыймаҫ, тип иҫкәртә халыҡ аҡылы. Ауылда сәләмәт йәшәү рә­үешен аңлатыуҙа ағинәйҙәрҙең өлөшө бик ҙур. Уларҙың етәксеһе — хаҡ­лы ялдағы уҡытыусы, ил инәһе, тормошо һәр кемгә өлгө булырлыҡ Зәкиә Мө­ҙә­рис ҡыҙы Муллағолова. Ағинәйҙәр ауылда төрлө мәҙәни саралар, оҫталыҡ дәрестәре, “түңәрәк өҫтәл”дәр үткәрә, ҡыҫҡаһы, йәштәребеҙгә тормош һа­баҡ­тары бирә. Уларҙың һәр береһенең йә­шәү рәүеше — яҡты өлгө. Мәктәптә бер нисә йыл рәттән ҡатын-ҡыҙҙар сове­тының әүҙем ағзаһы Гүзәл Боҫ­ҡонова етәкселегендә фитнес-клуб эшләп килә. Ул ҡатын-ҡыҙҙың һаулығын нығытыуҙа ҙур ярҙам күр­һәтә. Матур булма, бәхетле бул, бәхет матур күрһә­тә, ти халыҡ. Бәхет­ле булайыҡ, кешеләргә зыян кил­термәйек. Татыу йәшәйек, йәмәғәт!