Башҡорттар Латвияның баш ҡалаһы Ригала уҙғарылған һабантуйҙа ҡатнашты. Күркәм сара ҡаланың үҙәк паркында — “Верман баҡсаһы”нда үтте. Был турала башҡорт диаспораһы етәксеһе Ринә Хәмитова хәбәр итте.
Һабантуйға төрлө милләт вәкилдәре, дипломаттар, эшҡыуарҙар, журналистар, фотографтар, студенттар, күрше илдәрҙән ҡунаҡтар, сит ил туристары килгәйне.
— Сарала ҡатнашыусылар башҡорт, татарҙарҙың мәҙәниәте, йолалары менән танышты, уйындарҙа, бәйгеләрҙә көс һынашты, йырланы, бейене, милли аш-һыуҙан ауыҙ итте. Байрамға балаларҙың һәм йәштәрҙең күпләп килеүе айырыуса ҡыуандырҙы, — тине Ринә Хәмитова.
Парктағы төп сәхнәлә ҙур концерт булды. Унда Татарстандан, Латвия, Литва, Эстонияның милли-мәҙәни йәмғиәттәрен­дәге үҙешмәкәр артистар ҡатнашты. Спорт майҙансыҡтарында ярыштар һәм халыҡ уйындары биш сәғәт буйы дауам итте.
Байрамға йыйылыусыларҙы Латвия­лағы һәм Эстониялағы башҡорт диаспо­раһы етәкселәре сәләмләне. Ринә Хәми­това Башҡортостандың Рәсәй Президенты ҡарамағындағы тулы хоҡуҡлы вәкиле Артур Шәйнуровтың сәләмләү хатын уҡып ишеттерҙе.
— Һабантуй ысын халыҡтар дуҫлығы, изгелек, татыулыҡ, берҙәмлек байрамына әүерелде. Ул күп быуатлыҡ тормошобоҙҙо, башҡорттарҙың үҙенсәлекле милли йолаларының байлығын, гуманизм, тыныслыҡ һәм татыулыҡ идеалдарын сағылдыра, — тиелә ҡотлауҙа.
Таллинндағы “Ағиҙел” башҡорт йәм­ғиәте етәксеһе Флүзә Хәйруллина, ба­рыһын да байрам менән ҡотлап, һабан­туйҙы ойоштороусыларға Салауат Юлаев тураһындағы китап бүләк итте. Илнур Хәйруллин уйнаған ҡурай моңона Ринә Хәмитова “Гөлнәзирә” бейеүен башҡарҙы.
Латвияла һабантуй 30 йылдан ашыу үткәрелә. Быйыл уны “Шишмә” татар-башҡорт мәҙәни йәмғиәте, Европалағы татар йәштәре берекмәһе ойошторҙо. “Салауат Юлаев” Балтик халыҡ-ара үҙәге, “Аҡбуҙат” башҡорт йәмғиәте уларға ҙур ярҙам күрһәтте.