Яңыраҡ Рәсәй Президенты Владимир Путин тарафынан раҫланған законға ярашлы, пенсионерҙарға бер тапҡыр бирелгән аҡсалата компенсациянан физик шәхестәрҙең килеменә һалым рәүешендә 13 процент тотолоп ҡалмаясаҡ.
Хәтерегеҙгә төшөрәбеҙ: ил баш­лығы пенсияларҙы быйылға икенсе тапҡыр индексациялауҙы биш мең һумлыҡ түләүгә алмаштырыу тура­һындағы документҡа 22 ноябрҙә ҡул ҡуйғайны. Был аҡсаны алдағы йыл­дың ғинуарында илдәге барлыҡ пенсионерҙарға ла (эшләп йөрөгән­дәренә лә) бирәсәктәр. Бер генә шарт ҡуйылған: улар Рәсәйҙә даими йәшәгән булырға тейеш. Илдең Хеҙ­мәт һәм социаль яҡлау министрлығы вәкилдәре аңлатыуынса, уртаса кимәлдән аҙыраҡ пенсия алғандар өсөн әлеге компенсация хатта отошлораҡ та. Тик артабан бер тапҡыр түләү булмаясаҡ, пенсияны инфляция кимәленә ҡарап артты­рыуға кире ҡайтасаҡбыҙ, тиҙәр.
Биш мең һумлыҡ компенсация тураһындағы документтарҙы әҙерлә­гәндә бер әтнәкәһе килеп сыҡҡан: Рәсәйҙең Финанс министрлығы бел­гестәре асыҡлауынса, был түләү пен­сия менән тәьмин итеү йүнәле­шендәге башҡа ғәмәлдәрҙән айырмалы рәүештә һалымдан азат була алмай икән. Шуға ла Дәүләт Дума­һында айырым закон ҡабул ителде, ул Федерация Советында хуплан­ғандан һуң ил Президенты тарафынан раҫланды.
Әйткәндәй, шул уҡ ваҡытта Владимир Путин хәрби хәрәкәттәр ветерандарына айлыҡ түләүҙәрҙе физик шәхестәрҙең килеменә һалымдан азат итеү хаҡындағы законға ла ҡул ҡуйҙы.