Йыл һайын Ҡыш бабайҙың Бөйөк Устюгтағы резиденцияһы халыҡты ҡабул итә. Ҡышҡы тылсымсы көн дә 600-гә яҡын хат ала. Ун биш йыл эсендә Ҡыш бабайҙың электрон почтаһына өс миллиондан ашыу хәбәр килгән.
Башҡортостанда бер нисә көн буран уйнаны. Өйөрмәләп яуған ҡар юлдарҙы ҡапланы, яуым-төшөм күләме өс көн эсендә бер айлыҡ норманан ашып китте хатта. Буран ни тиклем ҡапыл башланһа, шулай уҡ тиҙ туҡтаны. Ә киләһе аҙнала 30 градусҡаса һыуытасаҡ. Был тотороҡһоҙлоҡ нимәгә бәйле тиһегеҙме? Бының үҙ сере бар: Башҡортостанға тәүге тапҡыр Бөйөк Устюгтан баш Ҡыш бабай килде!
Көҙҙән алып бөтә илдән меңдәрсә бала Ҡыш бабай­ға үҙҙәренең теләк­тәре тура­һында хат яҙа. Ҡайһы бер­ҙәренә уңыш йылмая – һәр ҡалала тылсымсы улар менән осрашып, теләктәрен үтәй. Мәҫәлән, Өфөлә йәшә­гән ете йәшлек Настя Копте­ловаға баш Ҡыш бабай менән аралашыу бәхете тейҙе. Ҡыҙыҡайҙың ҡолағы насар ишетә, шуға ҡара­маҫтан, ул музыка мәктә­бендә шөғөлләнә. Ишетеү аппараты уның Яңы йыл хыялы булған. Ҡыш бабай ҡыҙҙың теләген белеп ҡалып, уға ярҙам итте. Ун йәшлек Ангелина Әлимова үҙенә 35-се үлсәмле коньки һораған. Ҡыш бабай уның да үтенесен иғтибарһыҙ ҡал­дырмаған – ата-әсәһе тәрбиәһенән мәхрүм булған, өләсәһе менән йәшәгән ҡыҙға ла байрам бүләк итте.
– Өфө балаларының күп­селеге йорт хайуандарын һорай. Хазина эҙләү менән мауыҡҡан бер малай яңы металл эҙләү ҡоролмаһы, кемдер донъя буйлап сәйә­хәт, күбеһе төрлө гаджеттар, йәнһүрәттәрҙәге уйынсыҡ­тар хаҡында хыяллана. Балалар араһында планшеттар һәм смартфондар түгел, аңлашылмаған йәнһүрәт геройҙары урынына халыҡ әкиәттәре персонаждары, изгелек модала булһын ине, — тип теләктәрен дә еткерҙе Ҡыш бабай.
Сихри бабайҙың Өфөгә сәфәре “Ватан” этнопаркында уҙған байрам менән тамамланды. Бында ул Баш­ҡорт Ҡыш бабайы менән осрашты һәм шыршыла уттар ҡабыҙҙы.
Өфө – Рәсәй тылсымсы­һының ҙур сәйәхәте карта­һында 12-се ҡала. Ул 48 көн­дә 20-гә яҡын ҡалаға инергә һәм меңдәрсә саҡ­рым юл үтергә ниәтләй. Ҡыш бабай Төмән, Пермь, Новосибирск, Томск, Красноярск, Иркутск, Барнаул, Омск, Екатеринбургта бул­ған да инде.
Өфөнән Ҡыш бабай Ҡа­занға юллана. Был исем­лектә шулай уҡ Волгоград, Ставрополь, Дондағы Рос­тов, Түбәнге Новгород, Санкт-Петербург, Вологда һәм Мәскәү ҡалалары бар. Яңы йыл сәйәхәте 29 де­кабрҙә илдең баш ҡала­һында тамамланасаҡ.