— Бында кил, егет, бында. Балды 1,5 мең һумға ғына бирәм.
— Ит кәрәк булһа, апай, үтеп китмә: үҙе осһоҙ, үҙе һимеҙ.
— Картуф уңды быйыл, уңыштан һеҙгә лә ауыҙ иттерәм.

…Бына шундай шау-шыуға кү­мел­де Ишембай ҡалаһындағы Башҡорт нефтен тәүләп асыусылар майҙаны. Август аҙағынан бирле барған йәр­минкәләрҙең сираттағыһында ла та­уар күпләп үтте. Иң мөһиме – һа­тыусы ла, алыусы ла ҡәнәғәт.
Яр-Бишҡаҙаҡ ауылынан Айгөл менән Ғайсар Ҡәҙерғоловтар йәр­минкәгә икенсе йыл рәттән килә. Башлыса кәбеҫтә, кишер, ҡабаҡ һата­лар.
– Үҙем бюджет өлкәһендә эшлә­йем, йәмәғәтем – сәнәғәт тарма­ғында. Хеҙмәт хаҡына ғына ҡарап ултырмайбыҙ, баҡса тултырып йә­шелсә үҫтерәбеҙ. Ул үҙебеҙгә лә ҡала, һатыуға ла сығарабыҙ, – ти уңған хужабикә. – Кемдер балыҡ ҡармаҡларға ярата, буш ваҡытын телевизор алдында үткәргәндәр ҙә бай­таҡ, беҙ иһә баҡсанан инә бел­мәйбеҙ.
Ҡәҙерғоловтар һымаҡ үҙебеҙҙә етештерелгән ауыл хужалығы про­дукцияһына өҫтөнлөк биргән, заман талабын дөрөҫ тойған уңғандар етерлек бында. Шуныһы ла иғтибарға лайыҡ: һатыусылар райондың төрлө төбәгенән йыйылған. Насретдин бабай, мәҫәлән, Петровскийҙан кил­гән.
– Йәрминкәгә күптән йөрөйөм, һа­там да, һатып та алам. Ойоштороу­сы­ларға, район етәкселегенә ха­лыҡҡа ошо рәүешле ярҙам иткән­дәре өсөн рәхмәтлемен, – тип ихлас йылмая ул.
Һатып алыусы Маһира инәй ҙә шул уҡ фекерҙә.
— Йәрминкәләрҙә алған йәшелсә ҡыш сыҡҡансы етә, осһоҙораҡ хаҡ менән күберәк алып ҡалырға тырышам, — ти инәй.
Хәҙер инде халыҡ күберәк ит алырға килә.
– Ит менән сауҙа итеү ябыҡ баҙарҙа ойошторола. Урындар шу­лай уҡ бушлай, – тип аныҡлыҡ ин­дер­ҙе был йәһәттән район хаки­миәтенең ҡулланыусылар баҙары, хеҙмәт күр­һәтеү һәм эшҡыуарлыҡ бүлеге етәк­сеһе Илдар Хәсәнов. – Бинала һы­уытҡыстар ҙа, башҡа төр уңай­лыҡтар ҙа ҡаралған.
…Икмәк, картуф, ит, һөт, май – өҫтәлебеҙҙә көн дә күреп өйрәнгән ризыҡ төрҙәре. Тик бына улар та­бынға ни хаҡ менән килеп ята? Был тәңгәлдә йәрминкәләр, һис шикһеҙ, халыҡтың көнкүрешен бермә-бер еңеләйтә.