Районда йылына 180 миллион дана йомортҡа етештерергә иҫәп тотҡан фабрика сафҡа инде.


– Республикабыҙ халҡын экологик яҡтан таҙа, сифатлы ҡош ите менән тәьмин итеү район ғына тү­гел, республика иҡтисады үҫешенә ҙур өлөш индерә, – тине район хаки­миә­те башлығы Рәзиф Ғил­мул­лин ҡошсолоҡ фабрикаһын асыу тан­та­наһында. “Агро-Мен” холдинг ком­панияһы Түбән Таҡыя ауылын­да ҡе­үәтле заманса ҡошсолоҡ фаб­ри­каһын сафҡа индерҙе. Ике йыл элек тәүге нигеҙ ташы һа­лынған ойош­ма бөгөн Свердлов өлкәһенән “браун-ник” тоҡомло себештәрҙе ҡабул итте лә инде. Улар февралдә йомортҡа бирә башлаясаҡ. Барлыҡ корпустар төҙөлөп бөткәс, йылына 180 миллион дана йомортҡа етеш­тереләсәк был фабрикала.
Заманса предприятие респуб­ликабыҙ иҡтисадына тос өлөш ин­дер­мәксе: халыҡҡа 440-лап эш уры­ны булдырыла, ә Башҡортос­тан данын Рәсәй һәм башҡа сит төбәк­тәргә лә танытмаҡсы краснокамалар.
“Агро-Мен” ширҡәте идарасыһы Нәфис Вәсил улы Ғәйнетдинов беҙ­ҙе ҡошсолоҡ фабрикаһы менән таныштыра. Бер нисә корпуста Ита­лия, Австрия, Голландиянан ҡайтарылған заманса технологиялар пульт ярҙамында идара итеүгә көйләнгән. Ҡоштарҙы ашатыуҙа, һыу эсереүҙә ябай ҡул көсө ҡул­ла­нылмай, тимәк, эшселәрҙең хеҙ­мәте күпкә еңеләйгән. Йомортҡаны сорттарға айырыу, төрөү ҙә меха­низацияланған. Фабрика эшсән­дәренең хеҙмәт шарттары иһә бик яҡшы булмаҡсы: ашхана, душ, ял бүлмәләре ялт итеп тора.
Проектҡа һалынған инвестиция күләменең 2,45 миллиард һум тәш­кил итеүен төбәк үҫешенә тос бүләк тип баһаларға мөмкиндер. Һөҙөм­тәлә һалым түләү арта, халыҡтың көнкүреш шарттары ла яҡшырасаҡ. Әйткәндәй, Нәфис Вә­сил улы – күр­ше Та­­тар­с­тандың “Саллы-бройлер” ҡош­солоҡ фаб­рика­һын­да генераль директор урын­баҫары бу­лып оҙаҡ йылдар эш­ләп, оло тәж­рибә туп­лаған белгес.
– Тәүге осор­ҙа 300 мең тауыҡ, алмашҡа 110 мең баш йәш тауыҡ аҫраласаҡ. Улар йылы­на 90 миллион дана йомортҡа би­рә­сәк. Артабан иһә тағы шунса са­ма тауыҡ һыйған корпустар саф­ҡа инһә, йылына йәмғеһе 180 миллион дана йомортҡа етеш­те­рәсәк­беҙ, – ти ул, ғорур­ла­нып.
Ғорурланырлыҡ та шул. Ҡош­со­лоҡ фабрикаһының киләсәккә пландары ҙур. Ҡуян ҡасабаһында брой­лер цехы асып, тауыҡ итен тә­рән эшкәртеүҙе яйға һалмаҡ­сы­лар. Тәүге этапта һигеҙ корпуста йылы­на 7350 баш бройлер үҫте­рел­һә, икенсе этапта ла шул тиклем үк ҡош аҫ­ра­лып, йылына 30 мең тонна бройлер итен етештереү күҙаллана.
Бында иһә 340 кешегә эш уры­ны тәҡдим ителәсәк. Ҡатнаш аҙыҡ заводы ла үҙҙәренеке — сәғәтенә 20 тонна ем етештерә. Яҙ еткәс тә, заманса инкубаторҙа себештәр сығарыу күҙаллана.
Ошо тиклем ҡош-ҡортто аҫрау табышлы булһын өсөн, әлбиттә, иген культураларын үҙең үҫтереү зарур. Бының өсөн сәсеү майҙан­дары кәрәк. Агрохолдинг өс мең гектарҙы биләгән иген баҫыуҙа­рында быйыл мул уңыш үҫтереп алды, яңы ғына сафҡа ингән ете келәткә һаҡларға һалды. Быйылғы ураҡ батырҙары Роберт Мөбә­рә­ков, Андрей Биктубаев ике “Полесье” комбайнында мул уңыш йыйып алды.
— Ҡайһы бер баҫыуҙа гектар ҡеүәте 35 центнер тәшкил итте, — ти тәжрибәле баш агроном Алексей Тарасов. — Беҙгә тағы 17 мең гектар ер кәрәк. Краснокама һәм Ҡал­тасы райондары етәкселеге ярҙам вәғәҙә итте.
Әйткәндәй, агрохолдинг ике йыл­да 30 миллион һумға 12 берә­мек махсус техника һәм тағыл­ма­лы 24 ҡоролма һатып алған, баҫыу эштәрен үҙ көстәре менән әлегә 15 кеше атҡарһа, киләсәктә 50-гә еткермәкселәр.
Ер яҙмышына, яҡташтарының бөгөнгөһөнә, киләсәгенә битараф булмаған инвестор килде. Донъя­ла йәм артты.