“Ҡунаҡтар ҙур сәнәғәт ҡеүәтенә эйә булған, өр-яңы идеялар, тәҡдимдәр һәм инвестициялар йәһәтенән бар донъяға асыҡ төбәк менән танышты. Беҙҙең өсөн саммиттар – тәү нәүбәттә һөҙөмтәһе тиҫтәләрсә йыл менән баһаланасаҡ стратегик проект ул”, — тине республика Башлығы Рөстәм Хәмитов журналистар ҡатнашлығында үткән матбуғат конференцияһында, ШОС һәм БРИКС саммиттарына йомғаҡ яһап.
– ШОС һәм БРИКС саммиттарын Өфөлә, Баш­ҡорт­остан Республика­һында ҡабул итеү оло мәр­тә­бә бул­ды. Тәүге ярты йылда сараға әҙерлек йәһәтенән бурыстарҙы барлаһаҡ, һу­ңынан инде ең һыҙғанып эшкә то­тон­доҡ. Бөгөн, саммиттар үткәс, ти­рә-яҡ­ты байҡайбыҙ ҙа ни тиклем ҙур һәм яуаплы эш башҡарылғанын аң­лайбыҙ. Әммә был сик түгел, хәҙер инде алда тағы ла ҙурыраҡ маҡсаттар көтә. Әйткәндәй, Рәсәй Президенты ойоштороу кимәлен маҡтаны. Был – беҙҙең өсөн иң оло баһа, – тине төбәк Башлығы.
Ә йыйындың файҙаһына килгән­дә, Рөстәм Хәмитов тағы бер тапҡыр һалынған биналарҙың, юлдарҙың, ҡунаҡ­ханаларҙың, асылған парк һәм скверҙарҙың халыҡ мәнфәғәтендә эш­ләйәсәген әйт­те. “Эҫе” мәлендә инвес­торҙар менән әүҙемерәк хеҙ­мәт­тәшлек итергә, оҙайлы контракттар, төрлө тар­маҡтарҙа килешеүҙәр төҙөргә кәрәк­леген билдәләне.
Һуңғы йылдарҙа донъя эшҡыуарҙа­ры Башҡорт­останға инвестицияны әү­ҙем һала башланы. Әле Ҡытай бел­гестәре менән берлектәге тиҫтәнән ашыу проект тормошҡа ашырыла. Улар ҡорос прокатлау заводын төҙөү­гә, Ишембайҙа ауыр быраулау ҡулай­ламалары етештереүҙе яйға һалыуға, яңы теплицалар һәм бойҙайҙы тәрән эшкәртеү комплексын асыуға ҡағыла. Нефтекама автозаводы нигеҙендә Көньяҡ Африкалағы Bell компанияһы үҙбушат­ҡыс­тар етештерәсәк. Ҡа­ҙағ­стан­дың нефть һәм газ секто­ры ла беҙҙең менән әүҙем эшләргә теләй. Ҡырғыҙстан, Тажикстан, Үзбәкстанды аҙыҡ-түлек, йәшелсә, еләк-емеш ме­нән тәьмин итеү буйынса хеҙмәттәш итеп күрәбеҙ.
Журналистар һаулыҡ һаҡлау, мә­ҙәниәт, сәнғәт өл­кә­ләренә ҡағылышлы килешеүҙәр, киләсәккә кү­ҙал­ланған бурыстар, социаль мәсьәләләр менән дә ҡыҙыҡһынды. Осрашыу һуңында Рөс­тәм Хәмитов тағы бер тапҡыр Баш­ҡортостан халҡына, етәксе­лек­кә, ирек­мәндәргә, журналистарға рәхмәт һүҙҙәрен еткерҙе. “Был еңеүгә беҙ бергәләп өлгәштек”, — тип белдерҙе төбәк Башлығы.