Ҡаҙаҡ һәм башҡорт халыҡтары араһындағы дуҫлыҡ борон-борондан килә. Мәҫәлән, Ҡаҙтуған, Асан Ҡайғы, Шалғыйыҙ йырауҙарҙы улар ҙа, беҙҙекеләр ҙә үҙебеҙҙеке итеп һанай. Унан тыш, күпме эпостарыбыҙ, йырҙарыбыҙ ике милләт өсөн дә яҡын. Билдәле мәғрифәтсебеҙ Мифтахетдин Аҡмулланың ҡаҙаҡ далаларында белем биреүе үҙе ни тора! Ҡаҙаҡтарҙың “Батыр үҫтергең килһә, башҡорт ҡыҙына өйлән” тигән мәҡәле булыуы ла беҙҙең яҡынлыҡты иҫбатлай.

Ошо көндәрҙә М. Аҡмулла исемендәге Баш­ҡорт дәүләт педагогия университетында уҙға­рылған конференция ла – оло дуҫлыҡтың дауамы. Был сара Өфөлә үтәсәк ШОС һәм БРИКС илдәре саммиттарына арнап ойошторолоуы менән әһәмиәтле.
Конференция тиһәләр ҙә, ул башҡаларынан айырылып тора ине. Унда ҡатнашыусылар оҙон доклад уҡыманы, ә йыр-моң менән тамашасы кү­ңелен арбаны. БДПУ студенттары мәшһүр “Урал батыр” эпосын, шулай уҡ Шәйехзада Ба­бичтың шиғырҙарын үҙәккә үтерлек итеп һөйләне. Ә инде Аҡтүбә университетынан килгән бер төр­көм магистр халыҡ йырҙарын башҡарҙы, милли көйҙәрен думбырала уйнап ишеттерҙе. Улар дәртле йырын башҡарғанда хатта тамашасылар, урынында ултырып түҙмәй, ҡолас йәйеп бейергә төштө.
Бындай әһәмиәтле сараның беҙҙә ойошторолоуы тиктән түгел. Филология фәндәре докторы, про­фессор Розалия Солтангәрәева бына инде өсөнсө йыл С. Байышев исемендәге Аҡтүбә уни­вер­­­ситетында магистрҙарҙы уҡыта, башҡорт­тар­ҙың ауыҙ-тел ижады, халҡыбыҙҙың рухи ми­­­ра­ҫына бәйле лекциялар алып бара, оҫталыҡ дәрестәре күрһәтә. Шул уҡ ваҡытта М. Аҡмулла исемендәге Башҡорт дәүләт педагогия университетында ла һабаҡ бирә. Шуның менән билдәле ғалимә республикабыҙҙа ғына түгел, төрки донъя­һында ла сәсәнлек мәктәбен үҫтереү буйынса байтаҡ эш башҡара. Ә инде был көндә уның ике илдәге шәкерттәре лә бер майҙанда осрашты.
– Сәсәнлекте үҫтереү – туған телде һаҡлап ҡа­лыуҙың иң көслө ысулы, – ти Розалия Әсфән­диәр ҡыҙы. – Сәсән – тәү сиратта уҡытыусы ла, фекер­ләр­гә, зауыҡҡа өйрәтеүсе лә. Ошо мәктәп­тең даи­рә­һен киңәйтеү, йоғонтоһон арттырыу өсөн ҡа­ҙаҡ­тар менән яҡындан аралашып торабыҙ. Ә инде уларҙа сәсәнлек традицияһы борондан яҡшы һаҡланған.
– Бындай осрашыу беҙгә бик кәрәк, – тип бел­дер­ҙе филология фәндәре докторы, БДПУ-ның башҡорт филологияһы факультеты деканы Луиза Сәмситова. – Ҡаҙаҡ туғандарыбыҙ менән мәҙә­ниә­тебеҙ ҙә, тарихыбыҙ ҙа уртаҡ. Уларға кон­фе­рен­цияға барһаң, рәхәтләнеп аралашып, ру­хиә­теңде байытып ҡайтаһың.
Луиза Хәмзә ҡыҙы белдереүенсә, ике универ­си­тет араһындағы бәйләнеш йылдан-йыл көсәйә. Беҙ­ҙең егет-ҡыҙҙар Ҡаҙағстанға барып белемен камиллаштырһа, улар иһә Өфөгә килеп саф баш­ҡортса һөйләшеп йөрөй. Ә инде Башҡортостанда уҡыған белгестәр үҙ иленә ҡайтҡас та ҡәрҙәш ха­лыҡ менән бәйләнеште дауам итәсәк. Дәүләттәр араһындағы хеҙмәттәшлек рухлы, бер-береһен их­тирам иткән белгестәр әҙерләүҙән башлана ла инде.