Республика йортонда Башҡортостан Башлығы Рөстәм Хәмитов Бөтөн Рәсәй дәүләт телерадиотапшырыуҙар компанияһының генераль директоры Олег Добродеев менән осрашты.

Яҡтар халыҡ-ара саммиттар алдынан үҙ-ара бәйләнеш, компанияның төбәк филиалы эшен камиллаштырыу мәсьәләләрен тик­шерҙе.
– Һеҙҙең телерадиотапшырыуҙар компа­ния­һын һәр саҡ ихтирам иттек. Бик әүҙем, шәп эшләйһегеҙ, – тине Рөстәм Хәмитов. – Беҙ­ҙә­ге филиал да төп ойошма кеүек үк үҫешһен ине. Һуңғы ваҡытта, әлбиттә, ыңғай үҙгә­реш­тәр күҙәтелә. Контент сифаты яҡшы­ра. Бер үк ваҡытта төбәк филиалы Баш­ҡортос­тан юл­даш телевидениеһы менән дә хеҙмәттәш­леген дауам итһә, шат булыр инек.
Олег Добродеев иһә Башҡортостандағы бүлексәлә техник яҡтан ҡайтанан йыһазлан­дырыу буйынса эш башҡарылыуы, әле канал­дың саммиттарҙы яҡтыртыуға тулы­һынса әҙер булыуы хаҡында белдерҙе.
Һуңынан Рөстәм Хәмитов Олег Доброде­ев, уның урынбаҫарҙары Рифат Сабитов, Станислав Хаустов, Алексей Земский, “Баш­ҡортостан” дәүләт телерадиоком­па­ния­һы дирек­торы Азамат Сәлихов менән “Баш­ҡортос­тан” компанияһында өр-яңы ап­па­рат-студия комплексын асыуҙа ҡатнашты.
Өфөлә Шанхай хеҙмәттәшлек ойошмаһы ағзалары булған дәүләт башлыҡтары Советы ултырышын һәм БРИКС илдәре, хөкүмәттәре башлыҡтарының осрашыуын үткәргән көн­дәрҙә “Башҡортостан” телерадиокомпанияһы федераль эфирҙағы көндәлек тура тапшы­рыуҙар өсөн төп студия майҙансығына әүереләсәк. Комплексты ҡарап сыҡҡандан һуң, Рөстәм Хәмитов менән Олег Добродеев “Хәбәрҙәр – Башҡортостан” программаһының тура эфирында сығыш яһаны.