Ҡырымда референдум үтеүгә бер йыл тулды. Хәтерегеҙҙәлер, ярымутрау халҡы унда Рәсәй менән берләшеү теләген белдергәйне. Һуңыраҡ Ҡырым парламенты бойондороҡһоҙлоҡ тураһында ҡарар сығарҙы. Һөҙөмтәлә Ҡырым менән Севастополь беҙҙең Федерацияға ҡушылды. Был сараның әһәмиәтен халыҡ нисек баһалай икән?


Әҡсән МӨСЛИМОВ, йәмәғәт эш­мә­кәре:
– Илебеҙ, халҡыбыҙ өсөн был ваҡи­ға айырым әһәмиәткә эйә, сөнки Ҡы­рым элек-электән беҙҙең ер булған. Ярым­ут­рауҙың кире ҡайтыуын СССР дәүе­рен­дә ебәрелгән ҙур тарихи хата­ны төҙәтеү кеүек ҡабул иттем. Ҡы­рым­да Башҡортостан вәкиллеге лә тө­ҙөлдө. Ул ике республика араһын­да­ғы үҙ-ара фай­ҙалы сауҙа-иҡтисади, фәнни-техник, мәҙәни, гуманитар бәй­ләнештәрҙе киңәй­теү һәм тәрәнәйтеү йәһәтенән үҙ өлөшөн индерер тип ышанам.
Марсель ҠОТЛОҒӘЛЛӘМОВ, публицист:
– Рәсәй дәүләтселеге, ғөмүмән, Рә­сәй ҡәүеменең тарихы Ҡырым менән бәйләнгән. Уның һәр ҡарыш еренә ва­тандаштарыбыҙҙың ҡаны тамған. Ауыл­дашым Нуретдин ағай Абдуллиндың Севастополдән яҙған хаттарын әле бул­һа ҡәҙерләп һаҡлайым. Ул Бөйөк Ватан һуғышы йылдарында, ошо билә­мәләрҙе фашистарҙан һаҡлап, һәләк булды. Ҡырым, уның халҡы беҙҙең өсөн һәр саҡ яҡын булды тимәксемен. Бер йыл элек, халыҡ ихтыярын иҫәпкә алып, шул тиклем яуаплы аҙымға йөрьәт иткән ил етәксеһенә афарин!
Айрат ФӘХРЕТДИНОВ, эшҡыуар:
– Үҙәк телеканалдарҙың береһендә билдәле журналист, Ҡырымға бәйле хәл-ваҡиғаларҙы баһалап, “Беҙ көткән­дән насарыраҡ булды, ләкин элеккегә ҡарағанда һәйбәтерәк”, тигәйне. Ошо фекер менән тулыһынса килешәм.

Әнисә КӘРИМОВА, уҡытыусы:
– Майлы ҡалъяға ымһынғандар күп булды, әлбиттә. Йылы, йомшаҡ климат, өс яҡтан ярҙарын йыуған Ҡара диңгеҙ, караптар туҡтарға уңайлы ҡул­тыҡтар, бихисап үҫемлеккә бай ер... Ниһайәт, был низағтар артта ҡалды. Бер йыл – тыныслыҡта, берҙәмлектә, үҙ йортоңда. Рәсәйгә лә насар түгел: илен ҙурайтты, көньяҡта Ҡара диң­геҙгә ул хужа тиһәң дә була.
Фәнзил ХӘСӘНОВ, хеҙмәт ветераны:
– Нисек кенә булмаһын, былай ҙа ут эсендә ҡайнаған Украина өсөн би­лә­мәһенең ҙур бер өлөшөнән ҡолаҡ ҡа­ғыу еңел булмағандыр. Уйлап ҡара­ғанда, кемдең үҙ ерен, байлығын юғалтҡыһы килһен инде?! Әммә ватандаштары­быҙ­ҙың үҙ иленә ынтылышын бер ни­мә менән дә үлсәп булмай. Халыҡ-ара низағтар, ыҙғыштар, санкциялар үтер ҙә китер ул, иң мөһиме – үҙ-ара татыу булайыҡ.