– Нурмөхәмәт хәҙрәт, Әҙәбиәт йылының әһәмиәтен ниҙә күрә­һегеҙ?

Т. БАТЫРГӘРӘЕВА.

Саҡмағош районы.

– Бисмиллә­һир-рахмәнир-рахим!
Әс-сәләмү-ғә­ләйкүм үә рәхмә­тул-ла­һи үә бә­рә­кәтүһ, хөр­мәт­ле ҡәрҙәштәр! Исламда әҙә­биәткә, шиғриәт­кә элек-электән иғтибар ҙур бул­ған. Мәҫәлән, һүҙ оҫталары ара­һын­да бәйгеләр ойошторолоуы, иң тапҡыр теллеләрҙең халыҡ араһында абруй ҡаҙаныуы, бәхеткә өлгәшеүе хаҡында халҡы­быҙҙың ауыҙ-тел ижа­ды аша ла танышбыҙ. Сәсәндәр ысын­барлыҡта борон-борондан йәмғиәттә ҙур урын биләгән, уларҙың һүҙе иң кәрәк ваҡытта әйтелеп, кешелек тари­хындағы мөһим ваҡиғаларҙың нигеҙе булып торған.
Яҙма әҙәбиәт барлыҡҡа килгәс тә яҙыусыларҙың, шағирҙарҙың тел ҡөҙ­рәте кешелеккә тоғро юлдаш булыу­ҙан туҡталмаған. Һүҙ – һәр заманда ла иң ҡеүәтле ҡорал. Ул кәрәк сағын­да әҙәм балаһының осор ҡанаттарын һындырыр, шул уҡ ваҡытта ергә бөгө­лөп төшкәнгә ҡалҡынырға ҡул һуҙыр көскә эйә. Һүҙҙәр донъяһы булған әҙәбиәтебеҙ иһә – кешелеккә йәшәүгә ынтылыш биргән, уға һулар һауалай хеҙмәт иткән, яҡшылыҡҡа, яҡтылыҡҡа әйҙәгән рухи маяҡ. Быуаттар дауамында тупланған ошо тиңһеҙ хазинаны күҙ ҡараһылай һаҡларға, уның киләсәген тәьмин итер яҙыусылары­быҙ­ҙың, шағирҙарыбыҙ­ҙың ҡәҙерен белергә бурыслыбыҙ.
Әҙәбиәтебеҙҙең иң юғары нөктәһе – “Ҡөрьән Кәрим”. Изге китапта, шу­лай уҡ пәйғәмбәребеҙ Мөхәммәт ғәләйһис-сәләмдең хәҙистәрендә ик­һеҙ-сикһеҙ аҡыл, асылып бөтмәгән хикмәт ята. Уларҙың бөйөк тәрбиәһе киләсәк әллә күпме быуын вәкиленә тура юл күрһәтәсәк, яңы асыштарға юлыҡтырасаҡ.
2015 йылдың Әҙәбиәт йылы тип иғлан ителеүен ҙур ҡыуаныс менән ҡабул ҡылдыҡ. Алда әйтеп үткәнемсә, һүҙҙең кеше тормошонда тотҡан уры­ны баһалап бөткөһөҙ. Ул – телдең, әҙәбиәттең, мәҙәниәттең, сәнғәттең нигеҙе. Әгәр ҙә халыҡ үҙенең ошо ҡим­мәттәренә ҡарата хәстәрлек күр­һәтә, уларҙы үҫтерергә ынтыла икән, рухи хазиналарыбыҙ, иншаллаһ, һаҡ­ланыр, киләсәк быуындарға теүәл килеш еткерелер. Пәйғәмбәребеҙ Мө­хәммәт ғәләйһис-сәләмдең бер мөбә­рәк хәҙисендәге “Шиғырҙа сихри көс бар” тигән һүҙҙәре күп нәмә хаҡында һөйләй. Әҙәбиәт йылында телебеҙгә иғтибар, ихтирам артыр тип ышанам. Дөйөм маҡсатҡа һәр беребеҙ үҙ өлөшөбөҙҙө индерергә тырышайыҡ, хөрмәтле ҡәрҙәштәр. Тәү сиратта балаларыбыҙ күңелендә әҙәбиәткә, шиғриәткә, китапҡа һөйөү, ихтирам уятыу мөһим. Аллаһ Тәғәлә һәммә­беҙгә лә рухи мираҫыбыҙҙы һаҡларға, үҫтерергә насип ҡылһын, ҡәләм оҫта­ларын тел ҡөҙрәтенән айырмаһын, иншаллаһ. Әс-сәләмү-ғәләйкүм үә рәхмәтул-лаһи үә бәрәкәтүһ! Амин.