Иң элек гәзитебеҙҙең абруйын күтәреү, уның даирәһен киңәйтеү зарур. Ошо көндәрҙә донъя күргән бер баҫмала элекке мәғариф министры Сәбилә Сөләймәнова бик хаҡ фекер әйткән: “Зыялыларыбыҙ күп, шөкөр, ләкин уларҙың күпселеге — йә яҙыусы, йә артист, йә гуманитар өлкә буйынса ғалим. Ә ҡайҙа беҙҙең техник өлкә, ауыл хужалығы белгестәре, химиктар, математиктар, физиктар, нефтселәр, экологтар — бармы улар?”

Бынан теүәл ун һигеҙ йыл элек “Башҡортостан” гәзитенә (19 ноябрь, 1996 йыл) биргән бер интервьюмдан өҙөк килтерәм:
“Минең фекеремсә, “Башҡортостан” – баш­ҡорт иленең иң бөйөк, мөһабәт баҫмаһы. Азат илемдең төрлө тарафтары йә бейек тауҙарҙан, йә шаулап торған урмандарҙан, йә тыныс күл­дәрҙән ғибәрәт икән, уның миҙгелдәре тик ҡояшлы йәйҙән тормай икән, ғорур халҡымдың да гәзит биттәрендә урын алған күренекле шәхестәре, байрамдары яҙыусы­лар­­ҙан һәм уларҙың юбилей­ҙары­нан ғына тор­май­ҙыр бит. Ҡайҙа һуң беҙҙең ҙур етәкселәр, бигерәк тә сәнәғәт өлкәһендә, техник интеллигенция вәкилдәре, дәүләт эшмә­кәрҙәре, төрлө хужалыҡ тармаҡтарындағы, элек­кесә әйткәндә, “маяҡ­тар” – быларҙы эҙләп таба алмаҫһың”. Әлбиттә, был юҫыҡта байтаҡ ҡына алға китеш һиҙелә, әммә етерлек түгел. Шулай итеп, Сәбилә ханым олуғ гуманитар булһа ла, уның да теңкәһенә тейгән был хәлдәр.
Икенсенән, әлбиттә, ниндәй генә үрҙәргә үрлә­мәһен, гәзитебеҙгә был сик түгел, ул яңынан-яңы бейеклектәрҙе маҡсат итеп ҡуйырға ынтыла. Академик Зиннур Нурғәлин, халыҡ шағиры Абдулхаҡ Игеба­ев һәм халыҡ артисы Зифа Баязитова бик урын­лы, ҡыйыу башланғыс менән сыҡты. Ҡыҙғанысҡа ҡаршы, минең дә ҡайһы бер туғандарым гәзитте алдырмай. Был бурысты хәл итеүҙе үҙ өҫтөмә алам.