Хужалыҡтың мал көтөүе 2200 баштан ашыу булған 5-се Артауыл бригадаһында йыл һайын уртаса 200 баш үгеҙ һимер­тәләр һәм 500-ҙән артығыраҡ тананы һауынға әҙерләйҙәр. Эшсе ҡулдарға ҡыт­лыҡ булыуын иҫәпкә алып, бигерәк тә матди сығымдарҙы төрлө яҡ­тан кәметеүгә ынтылып, мал­дарҙы тәбиғи шарттарҙа бәй­­һеҙ ҡарауға йүнәлеш алын­ған. Яңыр­тып сафҡа индерелгән ҡурала элек мал ҡараған биш-алты кеше иңенә төшкән барлыҡ эштәрҙе бөгөн бер алмашсы менән ике малсы тулыһынса атҡара.
...Малдарҙы тәбиғи шарт­тарҙа ҡарауға иҫәпләнгән ҡу­ра­ла булып киткәндә төҙө­лөш тамамланыуға бара ине. Бын­да таналар тотоласаҡ икән.
— Бөтә эштәрҙе үҙебеҙ баш­ҡарабыҙ, — тип ҡаршы­ланы ферма мөдире Ғәзинур Гәрәев. — Егеттәр тырыша. Көндәр боҙол­ғансы малдар өсөн бар уңайлыҡтар тыуҙы­рырға ине иҫәп.
Хужалыҡ ниндәйҙер ярҙам­ға өмөт итмәй, үҙ хәленә ҡарап, төрлө тарафтан кәрәк-яраҡ йүнләгән. Ҡай­һы бер ерҙәгесә, “оҙон” аҡса эҙләп ситтән килгән ниндәйҙер оҫталар эҙләмәй – малсылыҡ ҡураларын яңыртыуға ҡул­дары күп эшкә килешкән урын­дағы ир-егеттәрҙе йәлеп ит­кән­дәр. Әйтергә кәрәк, улар­ҙың башҡарғанына ризаһыҙ­лыҡ белдерерлек түгел. Мә­ҫә­лән, Данил Хужиндың “болгарка” аппараты менән ҡалай һәм тимер арматура сыбыҡ­тарын “һә” тигәнсә киҫеп ырғы­тыуына ысынлап та һоҡланырлыҡ.
Ҡалған оҫталар, кәрәкле иҙмәне тейешле сифатта һәм күләмдә үҙҙәре әҙер­ләп, бу­ласаҡ ҡураның иҙәнен эшләй. Аль­берт Миңлеғолов, Ратмир Нухов менән Илдар Хөснул­лин эште ваҡытын­да тамамлауға ҙур көс һала.
Бөгөн хужалыҡта мал ҡыш­ҡы ҡураларға ҡайтарылған. Уларҙы заманса итеп төҙөк­лән­дергән егеттәрҙең хеҙмәт һөҙөмтәләренә таянып, ферма эшсәндәре үҙҙәренә йөкмәтелгәнде ең һыҙғанып тормошҡа ашырырға тотондо.