“Шаранагрогаз” асыҡ акционерҙар йәм­ғиәте лә һынатмай. Етәкселектең сәсеүлек майҙанын бер ҡасан да кәме­теүгә юл ҡуйғаны юҡ. Дөйөм ауыл хужалығы ерҙәре – һигеҙ мең гектарҙан ашыу! Ә инде шуның яртыһы – баҫыуҙар. Малсылыҡ тармағын да үҫтерәләр. Ти­мәк, сабынлыҡ менән көтөүлек тә иркен.
Хужалыҡтың генераль директор урын­баҫары Иван Петров билдәләүенсә, күптән түгел һы­йыр малын йәйге лагерҙан фермаға алып ҡайтҡандар. Ул егәрлеләрҙе һанап сыҡ­ты. Мәҫәлән, ураҡта Игорь Храмов, Александр Стариков, Илья Пушкарев, ең һыҙ­ғанып эш­ләгәнгә күрә, 60-ар мең һум эш хаҡы алып ҡыуанған. Быйыл бик яҡшы күрһәт­кестәргә өлгәшкән Ирина Сәхибгәрәева, Маруся Яманаева, Салауат Мөлөков, Рөстәм Ғарафутдинов­тар­ҙың хеҙмәте лә премия менән билдәләнгән.
Урында торлаҡ мәсьәләһен төрлөсә хәл итәләр. Кемгәлер тулы хаҡ­тың яртыһы өсөн генә иҫәпләшеү бәхете йылмайһа, икенселәр иһә өлөшләтә түләп ота. Ә бына “Шаранагрогаз” асыҡ акционерҙар йәмғиәте Дмитриева Поляна ауылында махсус рәүештә йорт төҙөп, торлаҡҡа мохтаждарға биреп ҡуй­ған. Хәҙер бында тиҫтәгә яҡын хеҙмәткәр ғүмер итә.
– Эшселәргә йорт ҡалҡытыу – заман талабы, – ти Башҡортостандың атҡаҙан­ған ауыл хужалығы хеҙмәткәре, “Почет Билдәһе” һәм Халыҡтар дуҫлығы ордендары кавалеры, “Шаранагрогаз” йәмғиә­те­нең генераль директоры Тимерғәле Тимеркәев. – Беренсенән, ауыл йәшәһен, тормош йәнләнһен тиһәк, минеңсә, һәр етәк­се ошо турала хәстәрлек күрергә бурыслы. Икенсенән, бындай алымды ҡул­ланыу эштең һөҙөмтәлелеген күпкә арттыра.
Үҙ мөйөшөн булдырған бәхетлеләрҙең бер нисәүһе менән күрешеп һөйләшкән­дә, барыһының да хужалыҡтың киләсәге өсөн яныуы, ғаиләһе өсөн тырышыуы күҙ­гә салынды. Мәҫәлән, ветеринар Гүзәл Мөхитова әйтеүенсә, йәшәгән урыны фер­маға ныҡ яҡын, өҫтәүенә, заманса шарттар булдырылған. Шулай уҡ һауын­сылар Фәйрүзә Хәйбуллина, Рита Морозова, водитель Азиф Зарипов, осеме­на­тор Лилиә Шәнгәрәева, ветеринар-табиптар Валентин Танылбаев, Диана Иванова һәм башҡаларҙың һөйөнөсө йөҙөндә сағыла.
Әйткәндәй, хужалыҡ өс йөҙ тирәһе кешене эш урыны менән тәьмин иткән. Ти­мәк, уларҙың барыһы ла социаль йәһәттән яҡланған, етәкселектең хәстәр­леге менән солғап алынған. Хәҙерге ваҡытта был – иң мөһиме.