Американан, Канаданан, Австралиянан, Европа союзы илдәренән аҙыҡ-түлекте индереү тыйылғас, хаҡтар бигерәк теҙгендән ысҡына башланы, Рәсәйҙең Монополияға ҡаршы хеҙмәтенең Башҡортостан буйынса идаралығына килгән ялыуҙар ҙа күбәйҙе. Бигерәк тә тауыҡ, күркә ите менән фаршына хаҡтар артты.

Башҡортостанда ҡош-ҡорт итен күп­ләп етештергән “Авдон” йәмғиәте 2 августан 2 октябргә тиклем бройлер түшкәһенә хаҡты 10,5 процентҡа күтәргән. М. Ғафури исемендәге Баш­ҡортостан ҡошсолоҡ комплексы тарафынан, һатып алыусылар сыл­бы­- рының барлыҡҡа килеүе сәбәпле, халыҡ өсөн продукция күпкә ҡиммәткә, мәҫәлән, күркә түшкәһе 53 процентҡа арттырылып һатылған. Бынан йәмғиәт байтаҡ килем алған. Рәсәйҙең Моно­полияға ҡаршы хеҙмәтенең Баш­ҡор­т­остан буйынса идаралығының бүлек етәксеһе Игорь Васильевтың әйтеүен­сә, “Башҡортостан ҡошсолоҡ комплек­сы” сауҙа йорто, М. Ғафури исемендәге Башҡортостан ҡошсолоҡ комплексы менән килешеүгә ярашлы, тауарҙы һатҡан. Был эште республикала дүрт ойошма — “Индюшкин”, “Индюшкин төбәк”, “Ит сауҙаһы компанияһы” һәм “МТК-төбәк” ойошмалары атҡарған. Һөҙөмтәлә өҫтәлгән хаҡ хатта 100 процентҡа барып еткән. Игорь Васильевтың әйтеүенсә, аҙыҡ-түлекте һатҡан был дүрт фирма, төрлө юридик исемгә эйә булһа ла, М. Ғафури исемендәге Башҡортостан ҡошсолоҡ комплексына ҡарай.
Башҡортостандағы аҙыҡ-түлек хаҡ­тарына контроль буйынса эш төркө­мөнөң Башҡортостан Дәүләт Йы­йы­лы- ­шында үткән ултырышында шулай уҡ тоҙланған балыҡҡа хаҡтарҙың — 1,43, ыҫланғанына 1,79 процентҡа артыуы билдәләнде.
– Хаҡтарҙың күтәрелеүе эмбаргоға бәйле түгел. Был — ғәҙәти инфляция процесы, нигеҙҙә, тауыҡ итенә, балыҡ­ҡа ҡағылды. Сырға килгәндә, кәштә­ләрҙә сит ил продукцияһы юҡ. Улар урынында — үҙебеҙҙә етештерел­гән­дәр. Мәҫәлән, Бәләбәй һөт комби­на­тының “Бельфор” сыры, рецебы ике йыл элек әҙерләнһә лә, сит ил конкуренттарын уҙып, һатып алыусылары­быҙға барып етә алмай ине. Хәҙер “Бельфор”ға юл асылды, — тине республиканың Сауҙа һәм ҡулланыу­сылар хоҡуҡтарын яҡлау буйынса комитет рәйесе Рөстәм Камалетдинов.
Тиҙҙән иткә хаҡ кәмер, ә ҡыяр, помидор кеүек йәшелсәләргә, емеш-еләккә, киреһенсә, күтәрелер тип күҙаллана. Әгәр йәшелсә-емеш һаҡлай торған урындар булһа, хаҡтар ҙа артыҡ “тешләшмәҫ” ине.
Рөстәм Камалетдинов “Башҡор­т­остан аҙыҡ-түлеге” проекты хаҡында ла һөйләне. Әле унда 1547 төр аҙыҡ-тү­лек етештергән 140 ойошма ҡат­наша. Эш төркөмө ағзалары Башҡор­т­ос­танда республика биләмәһендә етеште­релгән тауарҙарҙы һатыу-һатып алыу менән шөғөлләнгән логистик үҙәк булдырыу кәрәклеге хаҡында әйтте.