Шуға күрә Бөтә Рәсәй йәмәғәтселек фе­керен өйрәнеү үҙәге 2008 йылда үткәргән сара барышында “7 ноябрь байрам түгел, һеҙҙең өсөн ул нимәне аң­лата?” тигән һорауға рес­пон­денттарҙың 38 проценты “Бөйөк Октябрь ре­во­люцияһы көнө” тип яуаплауы тәбиғи. 2005 йыл (4 ноябрь тәү тапҡыр байрам ител­гән көн) менән сағыштырғанда, ошондай ҡарашта тороусыларҙың 9 процентҡа артыуы был тенденцияның көсәйеүе хаҡында һөйләй.
“Килешеп, тыныс йәшәү Рәсәй йәмғиә­тендә бер ҡасан да артыҡ булманы, шуға күрә ул турала (7 ноябрь һабаҡтарын. – М.Х.) иҫкә алыу бер ҙә урынһыҙ тойолмаҫ ине, — ти “Граждандар көсө” фирҡәһенең юғары советы рәйесе Владислав Иноземцев. — Ләкин сәйәси курстың сираттағы алмашыныуы сәбәпле килеп тыуған үҙгәрештәр нигеҙендә элекке дәүләт именлеге хеҙмәткәрҙәре ХХ быуат та­ри­хындағы иң мөһим ваҡиғаны оно­толоуға дусар итә”. Әлбиттә, Бөйөк Октябрь революцияһы – Рәсәй империяһы тарихы үҫешенең объектив эҙемтәһе донъя тарихы үҫешенә көслө йоғонто яһаған социаль ваҡиға. “Швед социализмы”ның, “япон мөғжизәһе”нең өлөшләтә боль­ше­виктарҙың социаль сә­йәсәтен файҙа­ланып ижад ителгәнлеген бөгөн бер кем дә инҡар итә алмай. Ошо йәһәттән ВЦИОМ-дың “һеҙ В.И. Ленинға ниндәй ҡарашта?” тигән һорауына рес­пон­дент­тарҙың 34 проценты “ихтирам менән”, 9-ы “һоҡланыу менән” тип яуаплауы аңлатмаға мохтаж түгел. “Советса” тигән төшөнсәгә респонденттарҙың 18 процен­ты “ғорурлыҡ менән”, 17-һенең – “хуплап”, 13-өнөң – “рәхмәт тойғоһо менән”, 10-ар процентының “һоҡланыу” һәм “өмөт тойғоһо менән” ҡарауы, ә 31 про­центының иһә “юҡһыныуы” ла 7 ноябрҙең ябай күренеш түгеллеге хаҡында һөйләй.
“Ни өсөн?” тигән һорауға яуапты әллә ҡайҙан эҙләргә түгел. Уҙған быуаттың 90-сы йылдарында иғлан ителгән яңы курс граждандарҙың ҙур өлөшөнөң матди хәле яҡшырыуға килтерһә, әҙәп-әхлаҡтың юҡҡа сыға барыуы арҡаһында йә­мә­ғәт­селек 2014 йылды Мәҙәниәт йылы тип иғлан итергә мәжбүр булмаһа, граждандар түләгән һалымдың өстән бер өлөшө именлек һәм оборона кеүек тармаҡтарға сарыф ителеп тормаһа, социаль сы­ғымдар хәҙерге 15 процент урынына Европалағы ише 70 процентҡа етке­рел­һә, бәлки, ватандаштарыбыҙ өсөн 7 ноябрь ысынлап та “ил тарихының һә­­ләкәтле бите”нә (әлегә уны рес­понденттарҙың 7 проценты ғына шулай ҡабул итә) әйләнер ине.