Ауыл халҡы мә­сетле булыу хаҡында күптән хыял­ланған. “Республиканың төр­лө төбә­гендә Аллаһ йорттары ҡалҡҡан­да, беҙ һаман да аҙан тауышын ишетеү бәхе­тенә өлгәшә алмайбыҙ”, – тип әсен­гән улар. Һөҙөмтәлә халыҡ күмәкләп мәсет төҙөргә ҡарар ҡылған. Ярҙам һо­рап, ауылдан сыҡҡан шәхестәргә лә мөрә­жәғәт иткәндәр. Мәҫәлән, Дәүләкән районы хакимиәте башлығы Закир Бик­булатов тыуған төйәгендә мәсет тө­ҙөүгә тос өлөш индергән. Барлыҡ яуап­лылыҡты үҙ өҫтөнә алған, сығымдар ҙа башлыса уның иңенә ятҡан. Төҙөлөштө ауыл егеттәре атҡарып сыҡҡан, бәғзеләр бинаны йыһазландырыу йәһәтенән булышлыҡ күрһәткән.
Башланған эш – бөткән эш, ти халыҡ. Смаҡ ауылына йәм өҫтәп, дүрт ай ҙа үтмәҫтән, күркәм мәсет ҡалҡып сыҡҡан. Ә күптән түгел халыҡ шундай уҡ дәр­рәүлек, ихласлыҡ менән иман йортон асыу тантанаһын үткәрҙе. Унда район хакимиәте вәкилдәре, дин әһелдәре, мәсетте төҙөүгә тос өлөш индергән кешеләр смаҡтарға иң изге теләктәрен еткерҙе.
– Иман йортон булдырыу өсөн хәләл көсөңдө түгеү – иң изге ғәмәлдәрҙең береһе, – тине Башҡортостан мосол­мандарының Диниә назараты рәйесе урынбаҫары Руслан Сәйәхов. – Изге йорт, иншаллаһ, ауыл халҡын бер-береһенә нығыраҡ яҡынайтыр, туплар рухи маяҡҡа әйләнер.
Мәсет төҙөү менән эш бөтмәй, уны тәртиптә тотоу, йылытыу, халыҡтың дини ихтыяжын ҡәнәғәтләндереү тағы ла ҙурыраҡ бурыстар өҫтәй.
– Иман йорто буш тормаһын ине. Ә бинаны хеҙмәтләндереүҙе күмәкләп хәс­тәрләрбеҙ, – тине был йәһәттән Закир Бикбулатов.