– Заманса мәғариф учреж­дениеһы төҙөү – социаль-иҡтисади үҫеш һәм халыҡтың тормошон яҡшыртыу мәнфә­ғәтендә яһалған сираттағы аҙым, – тине, тантананы асып, район хакимиәте башлығы Рим Сыңғыҙов. – Халыҡты борсоған иң көнүҙәк мәсьә­ләләрҙең хәл ителә барыуына шатбыҙ.
Рим Һатыбал улы Әбйә­лилдә һуңғы ике йылда был йүнәлештә ныҡлы эш алып барылғанын билдәләне. Мәҫә­лән, былтыр Байым, Рәхмәт мәктәптәрендә, Т. Кусимов исе­мендәге гимназияла мәк­тәпкәсә йәштәгеләр өсөн урын булдырылды, Амангилде, Дәү­ләт, Ташбулат, Йәнгел балалар баҡсаларында өҫтәмә төркөмдәр асылды, Әбйәлил ауылындағы бина яңыртылды, Дауыт башланғыс белем усағы кескәйҙәр учреждениеһы итеп үҙгәртелде.
– Балаларҙың күплеге – ха­лыҡтың йәшәргә ынтылышы күрһәткесе, – тине әлеге тантанала Румил Тәлғәт улы. – Ауылдарҙа сабый тауышы тын­маһын, балалар баҡса­лары, мәктәптәр гөрләп эшлә­үен дауам итһен, уларҙа рухлы быуын тәрбиәләнһен.
Сығыштарҙан һуң халыҡты яңы бина менән ҡыуандырған “Баймаҡ” ПМК-һы” йәмғиә­тенең генераль директоры Рафаэль Сырлыбаев “Миләш” балалар баҡсаһы мөдиренә символик асҡыс тапшырҙы.
Бында алты төркөм эшлә­йәсәк. Иркен тамаша, спорт залдары, дәрес үткәреү өсөн экология кабинеты, һүрәт төшөрөү студияһы бар. Психолог, логопед, шәфҡәт туташы айырым эш кабинеттарында ҡабул итә­сәк. Аш-һыу блогы, кер йыуыу бүлмәһе лә заманса йыһаз­ландырылған.