Һауыҡтырыу физкультураһы һәм спорт медицинаһы буйынса иң яҡшы врач тип Республика табиплыҡ-физкультура диспансерының бүлексә мөдире Наталья Бигбаева танылды. Республика туберкулезға ҡаршы клиник диспансерының балалар бүлексәһе мөдире, фтизиатр Ольга Шукаева – “Иң яҡшы фтизиатр”, Өфөнөң 13-сө ҡала клиник дауаханаһының табип-патологоанатомы Дмитрий Рудаков – “Иң яҡшы эксперт”, Гигиена һәм эпидемиология үҙәгенең бүлексә мөдире, врач-эпидемиолог Елена Рожкова “Иң яҡшы санитар врач” номинацияларында икенсе урынға лайыҡ булды. Баш ҡаланың 4-се стоматология поликлиникаһының дауалау бүлексәһе мөдире Софья Кашина — “Иң яҡшы стоматолог”, Ашығыс медицина ярҙамы дауаханаһының неврология бүлексәһе мөдире, табип-невролог Эмма Колчина “Иң яҡшы невролог” номинацияһында өсөнсө урынды алды.
Бөтә Рәсәй конкурсы 14-се тапҡыр үткәрелде. Быйыл, әйткәндәй, урта медицина хеҙмәткәрҙәре һәм фармацевтары араһында ла тәүге тапҡыр ил кимәлендә бәйге ойошторолдо. Бындай саралар медицинаға ҡағылышлы профессияларҙың бәҫен күтәреүгә мотлаҡ булышасаҡ, тип иҫәпләй конкурсты ойоштороу­сылар. Еңеүселәр өсөн иң төп приз — “Гәлсәр Гигиея”. Беренсе урынды яулағандарға — 500 мең, икенсе урынға лайыҡ булғандарға — 300 мең, өсөнсө урынды алғандарға 200 мең һум күләмендә аҡса бирелә.