Телефондан бәйләнешкә ин­гәндә, баш ҡалаға командировкаға сығыуы сәбәпле, урынында бул­маясағын әйтте, үҙенең уң ҡулы – агроном Салауат Фазылов хужалыҡтың бөгөнгөһө, киләсәккә уй-ниәттәре менән таныштырыр, тине һәм былай тип өҫтәне:
– Әҙәм балаһының береһе лә мәңгелек түгел, иртәме-һуңмы, барыбер ҙә дилбегәне кемгәлер тотторасаҡмын. Өмөт бағлаған алмашсым ышанысты аҡлаһын, егет кешегә етмеш төрлө һөнәр ҙә әҙ тигәндәй, ҡулынан килмәгән эше булмаһын. Ә ундайҙар беҙҙә бар, шуға ла күңелем тыныс.
Йәштәр тигәндән, Салауат Ил­дар улының хеҙмәт биографияһы нәҡ ошо хужалыҡта башланған, Башҡорт дәүләт аграр универ­ситетының агрономия факультетын тамамлағандан һуң, ул тыуған яғына юлланған. Дипломлы бел­гескә предприятие йорт төҙөүҙе хәстәрләгән. Һөйөнмәҫлекме ни! Шулай уҡ механизатор Александр Андреевҡа ла был йәһәттән хужалыҡ етәкселеге ифрат ҙур ярҙам күрһәткән.
Тоҡомсолоҡ заводының эшмә­кәр­легенә әйләнеп ҡайтҡанда, ошо көндәрҙә һыйыр малы йәйге лагерҙан фермаға алып ҡай­тыл­ған. Бының өсөн алдан уҡ һарайҙар рәтләнгән, һауын аппараттары урындарына эленгән, ти­реҫ түгеү ҡорамалдары көй­ләнгән. Мал аҙығы мул әҙер­ләнгән: 6 мең тонна силос, 500 тоннанан ашыу бесән, 600 тонна тирәһе һалам – быға асыҡ миҫал. Ҡыштың оҙон, ҡаты һыуыҡтары һәм ыжғыр бурандары менән иҫтә ҡалыуын иҫәпкә алып, “Максим Горький”ҙар аҙыҡты тейе­шенән артыҡ туп­лауҙы ғәҙәткә индергән, быйыл да ныҡ тырышҡандар.
Салауат Фазылов билдәлә­үен­сә, ауылда ғүмер итеү сылбырҙы хәтерләтә. Бер эште бөтөрөүгә икенсеһе башлана, унан сират­тағыһы... Күптән түгел ерҙе туңға һөрөү тамамланған, Виктор Черемнев менән Зиннур Әхмәтов ал-ял белмәй тир түккән. Артабан механизаторҙар автопаркты тәр­тип­кә килтереү мәшәҡәттәренә күмеләсәк, машина-трактор оҫтаханаһы гөрләп торасаҡ, ҡыҫ­ҡаһы, ҡыш осоронда ла һәр кемгә шөғөл табыласаҡ.
Хужалыҡ йыл да тиерлек берәй өр-яңы техника ала. Мәҫәлән, былтыр “МТЗ-82” маркалы “Беларусь” менән автопаркты яңырт­ҡандар, уның ҡеүәтле булыуы хайран ҡалдырған, шуны иҫтә тотоп, быйыл да шундай уҡ трактор һатып алғандар.
Водитель Азат Закиров, һауын­сылар Валентина Иванова, Наташа Япанова, ферма мөдире Салауат Сабиров, Сергей һәм Юрий Потаповтар менән тау аҡ­тарырға мөмкин булыуы, кемгәлер гел генә күрһәтмә биреп торғанда, уларҙың һәр эшкә үҙҙәре белеп тотоноуы тураһында ғорурланып һөйләне агроном. Максим Горький исемендәге тоҡом­солоҡ заво­дының идараһы Үҙәк усадьбала урынлашҡан. Бынан тыш, Урыҫ Швейцарияһы, Глуховской шифа­ханаһы, Үтәй ауылдары кешеләре лә бында үҙҙәренә эш тапҡан.
– Һыйыр малын ишәйтеү, сә­сеү­­лек майҙанын киңәйтеү – көн­үҙәк мәсьәләләрҙең береһе. Пред­приятиены беләләр, уңыш-ҡаҙаныш­тарыбыҙ етерлек, ошо кимәлдән төшмәһәк, барыһы ла уң барасаҡ, – тип тамамланы һүҙен әңгәмәсем.