“Салауат” торлаҡ кооперативы идараһы рәйесе Татьяна Смирнова билдәләүенсә, ҡатын-ҡыҙ – тыумыштан хужабикә, шуға күрә лә уға психолог булырға кәрәк. Уңғандар өйөн нисек итеп гөл баҡсаһына әйләнде­рергә белә. Шәхсән ул да был тәң­гәлдә бер ниндәй ҙә ауырлыҡ күрмәй, киреһенсә, вазифаһын бик яратып башҡара.
Уйлап ҡараһаң, Татьяна Смирнова йылы урынға килеп ултыр­ма­ған. Ошо эште ҡабул итеп алғанда, алда әллә күпме мәшәҡәт көткәнен белдеме икән?! Юҡтыр... Йорттар­ҙың күбеһе “хрущевка” – өҫкө ҡатта йәшәгәндәргә ҡыйыҡтан һыу тамсылай ғына түгел, ә шарлауыҡтай аға, йылытыу һәм һыу торбалары сереп тишелгән, стенанан штукатурка ҡойолоп тора... Бүтән етешһеҙ­лектәрҙе телгә алаһы ла түгел.
Салауат ҡалаһында ғүмер кисер­гәндәр шуға иғтибар иткәндер: әле күп йорттарҙы танырлыҡ та түгел. Йыл да үткәрелеп торған ремонт үҙ ваҡытында һәм сифатлы башҡа­рыла, ә инде капиталь ремонттан һуң бөтә донъя яҡтырып кит­кәндәй тойола. Канализацияны яңыртыуға, һыу һәм йылытыу торбаларын алмаштырыуға, иҫәпләү ҡорамалда­рын урынлаштырыуға айырыуса ҙур иғтибар бүленә. Бынан тыш, ихаталарҙы йәшелләндереү буйынса ла эҙмә-эҙлекле эш алып барыла. Ә инде ҡунаҡтар торлаҡ-ком­муналь хужалығында бындай хәстәрлекле ҡараштың булыуына көнләшеп ҡарай.
– Кешеләрҙең ышанысы беҙгә көндән-көн арта, – ти Татьяна Романовна. – Һәр кем бөхтәлеккә ынтыла, ҡайҙа күпме аҡса тотонолғанын уларға даими еткереп торабыҙ. Йыйылыштарҙа халыҡтың фекерен тыңлайбыҙ, күп осраҡта шунда әй­тел­гән кәңәш-төңәште эш барышын­да файҙаланабыҙ. Элекке йыл­дар­ҙан айырмалы, әле йортта йәшәүселәр һәр нәмәгә һаҡсыл ҡарай.
– Тимәк, һеҙҙә коммунизм икән, – тим, рәйестең һөйләгәнен тыңлағас.
– Улай тимәҫ инем, – ти ул. – Бары тик үҙеңдең ҡул аҫтындағылар менән мөнәсәбәтте оҫта итеп көйләй белеү шарт. Тәүҙән үк тиккә генә психолог төшөнсәһен телгә алманым бит.
Әйткәндәй, ошо юлдарҙың авторына ла күптән түгел Салауат ҡалаһы урамдарын, дөрөҫөрәге, кооператив хеҙмәтләндергән биләмәне ҡыҙырырға тура килде. Фәстер­мәйем, айырма ер менән күк араһы кеүек үк булмаһа ла, ундағы күркәмлекте бүтән бер ерҙә лә осратманым.