Юғары наградаға Ҡудашевтар, Мәмлиевтәр, Еникеевтар, Тереғоловтар кеүек күренекле татар мырҙаларының вариҫтары менән бергә башҡорт халҡы вәкилдәре лә лайыҡ булды.
Атап әйткәндә, “Любизар” 1-се башҡорт атлы полкы” хәрби-тарихи клубының идара рәйесе Илдар Шәйәхмәтовтың хәстәрләүе һәм тәҡдиме буйынса Стәрлетамаҡ районының Күсәрбай ауылынан сыҡҡан арҙаҡлы шәхес, 1812 йылғы яуҙа 2-се башҡорт атлы полкы командиры, улус старшинаһы, тархан булған, IV дәрәжә Изге Анна орденын алған Аралбай Аҡсулпановтың вариҫтары Кинйәбай, Гүзәл һәм Юлай Аҡсулпановтар, Стәрлетамаҡ ҡалаһынан яҙыусы һәм драматург, “Һуғыштың берҙән-бер бәхетле балаһы” исемле тарихи драма авторы Хәмит Ирғәлин, Башҡортостан үҙәк дәүләт архивының өлкән ғилми хеҙмәткәре Зөлфәр Ғәтиәтуллин бүләкләнде. “Любизар” клубы ағзалары – Дондағы Ростов ҡалаһынан Мәхмүт Сәлимов, Мәскәүҙән Алексей Орешков, Силәбе ҡалаһының Ырымбур казактары ойошмаһынан ветерандар советы рәйесе, 4-се башҡорт атлы полкы командиры Аҫылғужа Бакировтың вариҫы Рафаэль Бакиров – 1812 йылғы Ватан һуғышының 200 йыллығын билдәләүҙә, башҡорт халҡының яугирлек данын мәңгеләштереүҙә фиҙакәр хеҙмәт, шәхси үрнәк күрһәткәндәре өсөн миҙал алды.
1812 – 1814 йылдарҙағы һуғышта Еңеү Рәсәйҙә дәүләт кимәлендә 100 йылға бер байрам ителә. Башҡорттар быға ҡағылышлы тәүге тантананы 1912 йылдың авгусында Ырымбурҙа үткәргән. 1-се, 7-се, 8-се, 9-сы, 13-сө башҡорт атлы полктары яугирҙәренең вариҫтары казактар менән берлектә атлылар парадында ҡатнашҡан. Уларға губернатор Н.А. Сухомлинов “1812 йылғы Ватан һуғышына — 100 йыл” тигән миҙал тапшырған.
Әлеге осраҡта бүләктәрҙе “Любизар” 1-се башҡорт атлы полкы” хәрби-тарихи клубының идараһы рәйесе Илдар Шәйәхмәтов менән Дворяндар мәжлесе рәйесе Зөфәр Әйүпов өләште. Тантананы ойоштороусылар белдереүенсә, юбилей миҙалы Президент Владимир Путиндың туранан-тура күрһәтмәһенә ярашлы булдырылған, бүләкләнеүселәр исемлеге дәүләт комиссияһы тарафынан раҫланған.
Зөфәр Әйүпов барлыҡ йыйылыусылар алдында “Любизар” 1-се башҡорт атлы полкы” клубы идараһына һәм ағзаларына айырыуса ҙур хөрмәт менән ҡарауын белдерҙе, уларҙың үткән йылдарҙа “Бородино көнө”ндә, Лейпциг ҡалаһында үткән “Халыҡтар һуғышы” халыҡ-ара хәрби фестивалендә башҡорт халҡын Европа кимәлендә яҡшы күрһәтеп, лайыҡлы ҡатнашыуын да иҫкә төшөрҙө. “1814 йылдағы оло ваҡиғаға – Парижды алыуға – 200 йыл тулыуҙы билдәләгән көндәрҙә ошондай мәртәбәле сараларҙа ҡатнашыуҙары, халыҡты яҡшы эштәр, уйҙар үрнәге менән туплап, тантаналы ваҡиғалар уртаһында булыуҙары башҡорт халҡының тоғро тоҡомдарына ҡарата һоҡланыу тойғоларын көсәйтә” – тине Зөфәр Яҡуп улы, һүҙен йомғаҡлап.