Башҡортостан Башлығы вазифаһын ваҡытлыса башҡарыусы Радий Хәбиров ҡул ҡуйған Указ, ниһайәт, оҙаҡ йылдарға һуҙылған Торатау мәсьәләһенә нөктә ҡуйҙы.

Төбәктең геологик, биологик һәм тарихи-мәҙәни мираҫын һаҡлап ҡалыу, туризмды үҫтереү маҡсатында ҙур аҙым яһалды. Республика Хөкүмәтенә Ишембай, Стәрлетамаҡ райондары биләмәһендә “Торатау” геопаркын ойошторорға, уны республика әһәмиәтендәге “Торатау”, “Йөрәктау” тәби­ғәт ҡомартҡылары һәм баш­ҡа объекттар составына индерергә ҡушылды.

Быға тиклем килеп тыуған хәл ысын мәғәнәһендә бик ҡатмарлы ине. Стәрлетамаҡ ҡалаһының төп предприятиеһы булған “Башҡортостан сода компанияһы”, шулай уҡ уның менән бәйле башҡа предприятиеларҙа ғына ла бөгөн 18 меңдән ашыу кеше эшләй. Сеймал килеүҙән туҡтаһа, ун меңдән ашыу ғаиләнең төп килем сығанағынан мәхрүм ҡалыуы ихтимал. Быларҙан тыш, килем алған предприя­тиеның дивидендтар, һалымдар түләүен дә онотмаҫҡа кәрәк. Ҡыҫҡаһы, ҡаланы ҡала иткән “Сода” эшмәкәр­леге зыян күрһә, Стәрлетамаҡҡа бөгөнгө заман шарттарында йәшәүе бик ауырға төшәсәк. Рәсәйҙә бындай күңелһеҙ миҫал булған моно-ҡалалар ҙа, ҡасандыр гөрләп торған ҙуры­раҡтары ла етерлек.

Торатау тәбиғи генә түгел, тарихи ҡомартҡы булараҡ та халҡыбыҙҙа изге урын һанала. Эйе, “Сода”ға Ҡуштауҙы бирергә ҡарар итеү бик еңелдән түгел. Шунан һуң, сеймал булараҡ тапшырҙың да аҡтара ла башланылар тигән һүҙ түгел. Иң тәүҙә геология тикшеренеүе барасаҡ, планлы рәүештә саралар ҡараласаҡ, Шахтауҙа эш тамамланғас, рекультивация үткәреләсәк. Белгестәр фекеренсә, Шахтауҙа әле кәм тигәндә биш йылға етерлек сеймал бар. Ошо ваҡыт Ҡуштауҙа эш башларға әҙерлек алып барыу өсөн дә, Шахтауҙа рекультивация эшенә саралар планлаштырыуға ла етә. Әйткәндәй, Шахтау урынында парк, һыу ятҡылығы булдырыу, музей ойоштороу, ял итеү зонаһы ойоштороу ҙа күҙаллана.

Башҡортостан Хөкүмәте Премьер-министры урынбаҫары Рәйеф Әбдрәхимов әйтеүенсә, “Торатау” геопаркын ойоштороу буйынса Указды тормошҡа ашырыу эҙмә-эҙлекле алып барыласаҡ.

Башҡортостан Фәндәр академияһы, Рәсәй Фәндәр академияһының федераль тикшеренеү үҙәге менән берлектә “Торатау” геопаркын ЮНЕСКО-ның Бөтә донъя мираҫы объекттары исемлегенә индереү буйынса саралар планы төҙөләсәк. “Конгресс-холл” дәүләт бюджет учрежде­ниеһы атамаһын “Торатау конгресс-холы” дәүләт бюджет учреждениеһы итеп үҙгәртергә ҡарар ителде. Башҡортостан Хөкүмәтенә уларҙы тормошҡа ашырыуға бәйле сығым­дарҙы финанслау күләме менән сығанаҡтарын билдәләү бурысы йөкмәтелде.