Минималь эш хаҡы арта

“Минималь хеҙмәт хаҡы түләү тураһында”ғы федераль закон­дың 1-се статьяһына индерелгән үҙгәрештәргә ярашлы, 1 майҙан айлыҡ минималь эш хаҡы 11 163 һум күләмендә тәғәйенләнде.
Йыл башында ул 9 489 һумға тиң ине.

Баҡсасылар, белмәй ҡалмағыҙ!

Рәсәй Һалым инспекцияһының 333.35-се статьяһының икенсе өлөшөнә индерелгән үҙгәреш­тәр­гә ярашлы, коммерцияға ҡа­рамаған баҡсасылыҡ ойошмалары хужалыҡ ихтыяжына ер аҫты һыуҙарын ҡулланыуға лицензия алғанда дәүләт пошлинаһынан ваҡытлыса азат ителә.
Был закон 7 марттан ғәмәлгә инде һәм 2019 йылдың 31 декабренә тиклем көсөндә ҡала.

Ҡоралға рөхсәтең бармы?

“Ҡорал тураһында”ғы федераль закондың 23-сө статьяһына үҙгәрештәр индерелде. Хәҙер ҡорал алыу һәм һаҡлау, йөрөтөү хоҡуғы биргән лицензияны административ тәртиптә көсөнән сығарыу исемлеге билдәләнде.
Ойошмаларҙың ҡоралға хоҡуҡ ваҡыты үтһә, Эске эштәр министр­лығы тарафынан улар ғәмәлдән сығарыла. Шул уҡ ваҡытта был закон Рәсәй граждандарына ғына ҡағыла.

Исемең матур, кемдәр ҡушҡан?

Башҡортостан Респуб­ликаһы­ның Ғаилә кодексының 58-се статьяһына индерелгән үҙгәреш­тәр­гә ярашлы, ата-әсәләр балаға исем ҡушҡанда исемдә һан, хәреф-һан тамғалар, сим­вол­дар, хәреф булмаған билдә­ләр, тиргәү, ранг, вазифа, титул һүҙҙәре ҡулланыу тыйыла. Шулай уҡ атай менән әсәйҙең фами­лияһы ике төрлө булғанда, ике фамилияны ла берләштереп алыу рөхсәт ителә. Әммә ул ике һүҙҙән артмаҫҡа һәм фамилиялар араһында һыҙыҡса ҡуйы­лырға тейеш.

Хөкөм ителгәндәр ғаиләһе менән йәшәй ала

Рәсәй Юстиция министрлы­ғының бойороғона ярашлы, эске тәртипте боҙмаған хөкөм ите­леүселәргә ғаиләләре менән ҡуртымға алынған йәки колония-поселение эсендә йә ошо территорияла урынлашҡан муниципаль берәмектәге шәхси йорт­тарҙа бергә йәшәү рөхсәт ителә.
Бындай хоҡуҡты алыу өсөн хөкөм ителеүсенең ғаризаһы һәм ҡатынының, бәлиғ булмаған балаларының бергә йәшәү өсөн ризалығы, торлаҡҡа хоҡуҡтарын раҫлаусы документтары булырға тейеш. Хөкөм ителеүсенең ғаризаһын урындағы учреждение ҡарағандан һуң раҫлау өсөн Рәсәй Яза башҡарыу федераль хеҙмәтенең территориаль органына ебәрә.
Рөхсәт алған осраҡта, хөкөм ителеүсе айына дүрт тапҡыр колония-поселениеға килеп теркә­леп торорға тейеш. Ғаиләнең йәшәү шарты менән холоҡ төҙәтеү етәкселеге танышыу хоҡуғына эйә.

Өфө ҡалаһы Киров районы прокуратураһы.