Өфөнөң Еңеү паркындағы Мәңгелек ут янында Бөйөк Ватан һуғышы йылдарында һәләк булған дүрт ҡыҙылармеец – Павел Сухих, Сәйфетдин Хөсәйенов, Егор Лаптев һәм Семен Третьяков менән бәхилләштеләр. Павел Андреевич менән Сәйфетдин Хөснөтдин улының һөйәктәрен тыуған яғында ерләү өсөн Төньяҡ-көнбайыш федераль округындағы Хәрби-тарихи үҙәктең “Өйгә табан юл” проекты нигеҙендә килтерҙеләр.

– Көйөргәҙе районында тыуып үҫкән, 170-се уҡсылар дивизияһының 391-се полкы яугире Павел Андреевич Сухих 1941 йылдың 6 июлендә Псков өлкәһенең Заситин ауылы эргәһендә һәләк була. Уны 2017 йылдың 28 октяб­рендә Псков өлкәһенең “Онотол­ған батальон” эҙәрмәндәр отряды таба. Ишембай районының Маҡар ауылында тыуған Сәйфетдин Хөснөт­дин улы Хөсәйенов иһә 1941 йыл аҙағында Смоленск өлкәһенең Ельня ҡала­һы янында барған һуғышта хәбәр­һеҙ юғала. Уның яҙмышы быйыл ноябр­ҙә генә асыҡлана. Смоленск өлкә­һенең “Гвардеец” эҙәрмәндәр отряды ҡыҙыларме­ецтың һөйәктәрен таба, медальоны буйынса шәхесен билдәләй, – тине “Рәсәй эҙәрмәндәр хәрәкәте” ойошмаһының Башҡорт­остан­дағы төбәк бүлексәһе етәксеһе Владимир Волков.
Шулай уҡ Шаран районы яугирҙәре, 145-се айырым уҡсылар бригадаһында хеҙмәт иткән кесе сержанттар Егор Георгиевич Лаптев менән Семен Афанасьевич Третьяков та тыуған яғына әйләнеп ҡайтты. Улар 1942 йылдың 9 майында Новгород өлкәһендәге Иҫке Рамушев ауылы янында һәләк булған. Һөйәктәрен быйыл сентябрҙә Киров ҡалаһының “Фронт” отряды эҙәрмән­дәре таба. Ирекмәндәр 1942 йылдың 23 декабрендә Тверь өлкәһендә хәбәр­һеҙ юғалған һәм быйыл яҙ Кировтағы “Гвардеец” отряды тарафынан табыл­ған Дмитрий Емельянович Меньшиков­тың да медальонынан алынған ҡу­шым­таны килтерә.
Һалдаттарҙы һуңғы юлға оҙатырға туғандары, Дәүләт Думаһы депутаты Илдар Бикбаев, эҙәрмәндәр, республика хәрби комиссариаты, Өфө хаки­миәте, ветеран ойошмалары вәкил­дәре, уҡыусылар, йәштәр килгәйне.