Һигеҙенсе Мөрәжәғәтнамә... 47 минут 20 секунд… Республика Башлығының Дәүләт Йыйылышы — Ҡоролтайға йыллыҡ Мөрәжәғәтнамәһе әллә ни оҙаҡ ваҡытты алманы. Әммә эстәлеге... Документ бик конструктив төҙөлгән ине. Һәр фекер, һәр һүҙ төптән уйланылған, объектив һәм, иң мөһиме — ышаныс менән һуғарылған. Хөкүмәткә, халыҡҡа, яҡты киләсәккә ышаныс...

Ғәҙәттә, теләһә ниндәй рәсми документты ла ҡануниәт базаһына, иҡ­ти­садҡа, сәнәғәткә, инновация үҫеше йүнәлеш­тәренә, статистика күр­һәт­кестәренә бәйләргә күнеккән­беҙ. Мөрәжәғәтнамәлә лә һандар, процент­тар, сағыштырыуҙар булды — унда башҡарма власть тарафынан башҡарылған ғәйәт ҙур эш күләме лә, республикалағы бөтә дәүләт власы орган­дары сис­темаһының, урындағы үҙидара­ның, эшҡыуарлыҡ­тың, граждандар йәм­ғиәте институ­т­тарының киләсәккә бурыстары ла сағылыш тапты. “Үҫеште тәьмин итеү өсөн тәү сиратта хеҙмәт етештереү­сәнлеген артты­рыу мөһим, — тине республика етәксеһе. — Был йәһәттән беҙ киләһе йылдарҙа тәүге биш төбәк исем­легенә инергә бурыслыбыҙ. Әммә төплө нигеҙ булдырмай тороп, күрһәткестәрҙе яҡшыртыу мөмкин түгел”. Быныһы әлеге шул иҡтисадҡа ҡағылғандарынан. Асылда иһә республика Башлығы мәғарифты, һаулыҡ һаҡлауҙы, фәнде үҫтереүгә, ғаилә институтына бу­лыш­лыҡ итеүгә баҫым яһаны. Сәләмәт, имен, эшле, ашлы ғаилә – то­то­роҡ­ло киләсәк. “Ғүмер оҙонлоғо арта, әммә 10 – 15 йылдан 35 йәшкә тик­лем­ге йәштәр күпкә кәмейәсәк, был — 90-сы йылдарҙағы демографик көр­сөк һөҙөмтәһе. Шуға күрә илгә йәш көстәр бик ҡәҙерле. Уларҙың һәр бе­реһе алтынға бәрәбәр, был быуынды бар яҡлап та үҫтереү, дөрөҫ һө­нә­ри йүнәлеш биреү, интеллектуаль ресурс­тарын камиллаштырыу бөгөнгө замандың бурысы булып тора”, — тине Рөстәм Зәки улы.
Тағы бер йүнәлеш — һәләтле балалар менән эшләү. Был тәңгәлдә гранттар системаһын индереү мотлаҡ. Киләһе йылда фәнни йүнәлеш буйынса лицей-интернат асыу бурысы ҡуйылды.
Төбәк етәксеһе дуаль белем биреү сифатын күтәреү зарурлығын да билдәләне. Рөстәм Хәмитовтың фекеренсә, шул саҡта уҡыу йортон тамамлаусылар яҡшы технологик әҙерлекле таныш етештереү майҙан­сыҡтарына киләсәк. “Уйланылған һөнәри йүнәлештең бөтә уҡыу йорттары өсөн төп темаға әүерелеүе, уҡыусылар өсөн һөнәрҙәр, предприятиелар менән виртуаль һәм реаль танышыуҙың ҡыҙыҡлы ойошторолоуы мөһим. Был эшкә тармаҡ министрлыҡтары һәм ведомстволары, эш биреүселәр берекмәләре, эшҡыуарлыҡ ҡушылырға тейеш”, — тине ул.
Баш ҡалала балалар өсөн турист маршруты ойоштороу, уҡыусылар һәм студент­тарҙы “Рәсәй — минең тарихым” музейына бушлай индереү, халыҡтың заманса технологиялар өлкәһендәге белемен үҫтереү, Фәнгә ярҙам итеү һәм үҫтереү фондына республика статусы биреү, йәш ғалим­дарҙы ҡырға ебәрмәү, хатта ситтән йәлеп итеү, был тәңгәлдә гранттарҙы арттырыу — Мөрәжәғәт­намәлә һәр тәҡдим урынлы һәм ваҡытлы яңғыраны.
Халыҡтың сәләмәтлеге хаҡында ла һүҙ әйтте Башлыҡ. Шул уҡ ваҡытта: “Халыҡ­тың үҙаңын нығытыу ҙа мөһим, кеше үҙ һаулығы өсөн яуаплылыҡ тойорға тейеш. Ә был тәрбиә тап ғаиләлә һалына”, — тине ул. Ғөмүмән, йәмғиәттең һәр тармағы бер-береһе менән шул тиклем тығыҙ бәй­лән­гән — ғаилә именлеге социаль-иҡти­сади үҫештең нигеҙе булып торһа, етеш, имен тормошто шулай уҡ тотороҡһоҙ үҫеш шарттарында тәьмин итеп булмая­саҡ. Шуға күрә лә Башҡортостанда ғаиләне яҡлау, һаҡлау буйынса эшмәкәрлек иҡти­сад, сәйәсәт, сәнәғәт менән бер аҙым­дан иғтибар үҙәгендә ҡала. Шунһыҙ мөмкин дә түгел, ярамай ҙа.