Илдар Абдразаҡов Михайлов театрының художество етәксеһе итеп тәғәйенләнде

Санкт-Петербургта Михайлов театрының яңы художество етәксеһе итеп Рәсәйҙең халыҡ артисы Илдар Абдразаҡов тәғәйенләнде. Был хаҡта театр коллективы менән осрашыуҙа ҡала губернаторы Александр Беглов иғлан итте.

«Бөгөн театр тарихында яңы бит асыла, яңы художество етәксеһе тәғәйенләнде», – тине Беглов һәм коллективты яңы художество етәксеһе менән таныштырҙы.

Сарала Абдразаҡовты тәғәйенләү тураһында бойороҡ уҡып ишеттерелде. «Абдразаҡов Илдар Әмир улын эшкә алырға. Вазифа: театрҙың художество етәксеһе», – тиелә бойороҡта.

«Мусоргский исемендәге Санкт-Петербург дәүләт академия опера һәм балет театры – Михайлов театрының художество етәксеһе вазифаһын ҡыуанып, ҙур яуаплылыҡ менән ҡабул итәм һәм һоҡланғыс театр коллективының бер өлөшө булыуым менән бәхетлемен, — тип яҙа Илдар Абдразаҡов социаль селтәрҙәге сәхифәһендә. — Михайлов театры — бай тарихы, шәп труппаһы һәм тоғро, һиҙгер тамашасыһы булған үҙенсәлекле донъя. Бар ғүмеремде сәнғәткә һәм операға бағышлайым. Хәҙер мин Михайлов театры быуаттар буйына тупланған традицияларын артабан да һаҡлап ҡалһын һәм шул уҡ ваҡытта ҡыйыу рәүештә алға ҡараһын, яңы исемдәр асһын өсөн бөтә көсөмдө, тәжрибәмде һәм белемемде йүнәлтергә әҙермен. Михайлов театрының Севастополь опера һәм балет театры менән (мин унда ла художество етәксеһе) хеҙмәттәшлеге ике коллектив өсөн дә яңы офоҡтар асыр һәм тамашасыларға уртаҡ сағыу проекттар бүләк итер тип ышанам. Алда күп эштәр көтә, мин данлыҡлы Михайловский театрында сәнғәткә хеҙмәт итеү мөмкинлеге булыуына ысын күңелдән шатмын».

https://www.bashinform.ru/news/culture/2026-03-11/ildar-abdrazakov-naznachen-hudrukom-mihaylovskogo-teatra-peterburga-4610648