Республикала дәүләт эшмәкәре һәм меценат Раев тураһында фильмдың премьераһы көтөлә

Башҡортостанда дәүләт эшмәкәре, меценат һәм Раевка тимер юл станцияһына нигеҙ һалған Александр Федорович Раев тураһында фильмдың премьераһы иғлан ителде. Был турала Әлшәй районы башлығы Наил Әбелғужин үҙенең телеграм-каналында яҙа.

Эшҡыуар Татьяна Гридина уйлап сығарған проект талантлы профессионалдарҙы: сценарий авторы һәм режиссёр Эльвира Шрайнер, рәссам Анна Дубакина, тыуған яҡты өйрәнеүсе Сергей Попков һәм актерҙар командаһын берләштерҙе.

Фильм төшөрөүгә әҙерлек бер йыл барҙы. Команда Александр Фёдоровичтың тормошо менән бәйле урындарға: уның тыуып үҫкән һәм бала сағы үткән Һарытау өлкәһенең Вязовка ауылына, биографияһының күп кенә мөһим мәлдәренә шаһит булған Санкт-Петербург ҡалаһына барып ҡайтты.

«Генераль бағыусы Татьяна Гридинаның ярҙамы һәм ижади төркөмдөң фиҙакәрлеге менән тәрән хис-тойғолар һәм тарихи асыштар менән тулы үткәнебеҙгә мауыҡтырғыс сәйәхәт килеп сыҡты, — тип уртаҡлашты район башлығы. — Проектта ҡатнашыусыларҙың барыһына ла бөйөк кеше тураһында хәтерҙе һаҡлауға һәм кинематография сәнғәте шедеврын булдырыуға өлөш индергәне өсөн рәхмәт белдерәм. Тиҙҙән ихласлыҡ менән һуғарылған картинаның премьераһы көтөлә».

Бынан алдараҡ Башинформ Өфөлә Раевка ауылына нигеҙ һалған Александр Раев тураһында фильм өҫтөндә эш башланыуы хаҡында хәбәр иткәйне.

https://www.bashinform.ru/news/culture/2025-08-20/v-bashkirii-anonsirovali-premieru-filma-o-gosdeyatele-i-metsenate-raeve-4355948