AY YOLA һәм UZORITSA «Таврида.АРТ» фестивалендә Башҡортостан исеменән сығыш яһай

1 августан 3 авгусҡа тиклем Ҡырымда етенсе тапҡыр «Таврида.АРТ» йәш сәнғәт фестивале ойошторола.

Фестивалдең махсус ҡунағы – ижадында традицияларҙы һәм заманса музыкаль стилдәрҙе берләштергән, Homay йыры менән донъя чарттарын яулаған AY YOLA музыкаль проекты.

Фестивалдә республикабыҙ исеменән шулай уҡ UZORITSA фолк-төркөмө сығыш яһай. Төркөм фольклор нигеҙендә ижад ителгән, заманса аудиторияға ла яҡын булған үҙенсәлекле музыкаһы менән һөйөндөрә.

Биш сәхнәлә төрлө стилдә һәм жанрҙа башҡарыусыларҙың сығыштары көтөлә, тип хәбәр иттеләр мәҙәниәт министрлығының матбуғат хеҙмәтенән. 250 гектар хозур ер, 300-ҙән ашыу сара: шоу, музыка, кино, театр, бейеүҙәр, әҙәбиәт, һынлы сәнғәт – фестиваль бер урында илебеҙ мәҙәниәтенең төрлөлөгө менән таныштыра.

Иң яҡшы театр коллективтары һәм студиялары үҙҙәренең спектаклдәрен һәм постановкаларын күрһәтә. Төбәктәр фестивалгә мәҙәни һәм гастрономик ҡаҙаныштарын алып килә. Рәссамдар һәм дизайнерҙар визуаль сәнғәт менән таныштыра. Һуңынан меңәрләгән ҡатнашыусы сағыу колоннаға теҙелеп фестиваль биләмәһенән үтергә тейеш. Шулай итеп, «Таврида.АРТ» йәнә барлыҡ төбәктәрҙән ижади ҡарашлы йәштәрҙе бергә туплай.

«Таврида.АРТ» фестивален тамаша ҡылыу өсөн 16 июлгә тиклем бушлай сайтта теркәлергә кәрәк.

https://www.bashinform.ru/news/culture/2025-06-25/ay-yola-i-uzoritsa-predstavyat-bashkiriyu-na-festivale-tavrida-art-4289606