Өфөгә «Донбасс» дәүләт йыр һәм бейеү ансамбле килә

18 апрелдә «Башҡортостан» дәүләт концерт залында Фәйзи Ғәскәров исемендәге дәүләт академия халыҡ бейеүҙәре ансамбленең һәм «Донбасс» атҡаҙанған дәүләт академия йыр һәм бейеү ансамбленең берлектәге концерты була. Концерт президент иғлан иткән Ватанды һаҡлаусылар йылына һәм Бөйөк Еңеүҙең 80 йыллығына арнала.

- Концерт программаһы «Йәшәйәсәкбеҙ» тип атала, – тип белдерҙеләр ансамблдең матбуғат хеҙмәтендә. – Һуғыш йылдарындағы үлемһеҙ әҫәрҙәр һәм заманса композициялар һәр тамашасының йөрәгенә үтеп инерлек. Уларҙа 80 йыл элек еребеҙҙә тыныслыҡ һәм азатлыҡ өсөн көрәшкән атай-олатайҙарыбыҙға сикһеҙ рәхмәт тойғоһо сағыла.

«Донбасс» – Донецк Халыҡ Республикаһының визит карточкаһы (генераль директоры һәм художество етәксеһе – Ольга Горячева). Коллективтың ижады ла 100-ҙән ашыу милләт вәкиле йәшәгән төбәк кеүек  сағыу һәм күп милләтле. «Донбасс» ансамблен 1937 йылда композитор Зиновий Дунаевский ойоштора. Шахтерҙар ансамбле (коллективтың тәүге исеме) Бөйөк Ватан һуғышы йылдарында Көньяҡ фронтта сығыш яһай, меңгә яҡын концерт бирә, «Кавказды обороналаған өсөн» һәм «1941-1945 йылдарҙағы Бөйөк Ватан һуғышы осоронда маҡтаулы хеҙмәте өсөн» миҙалдары менән бүләкләнә.

Коллективтарҙың бер сәхнәлә сығыш яһағаны бар. 2021 һәм 2022 йылдарҙа Өфөлә ансамблдәрҙең берлектәге концерты үтте, тип асыҡлыҡ индерҙеләр ансамблдең матбуғат хеҙмәтендә.

https://www.bashinform.ru/news/culture/2025-04-03/v-ufu-priezzhaet-gosansambl-pesni-i-tantsa-donbass-4182885